ქართული ოცნებიდან წასული დეპუტატი, დავით ჭიჭინაძე მემარცხენე-კონსერვატიულ პოლიტიკურ მოძრაობას ქმნის. On.ge-სთან საუბარში დეპუტატი აღნიშნავს, რომ წარდგენა 22 ივნისს, თბილისში გაიმართება, დამფუძნებელი კრების შეხვედრა კი, სავარაუდოდ, სექტემბერში იქნება.

დავით ჭიჭინაძის თქმით, მის მოძრაობას ეკა ბესელიასთან და გედევან ფოფხაძესთან კავშირი არ აქვს. ამბობს, რომ ბესელია დამოუკიდებლად აკეთებს პარტიას.

დეპუტატი აღნიშნავს, რომ მისი გუნდი ქართული ოცნებიდან წასული პოლიტიკოსებისგან და ყოფილი მხარდამჭერებისგან დაკომპლექტდება და აპირებს, 2020 წლის საპარლამენტო არჩევნებში მიიღოს მონაწილეობა.

2018 წლის ივლისში, საჯარო განცხადებების გამო ქართული ოცნების სამდივნოს გადაწყვეტილებით, პარლამენტის დეპუტატი დავით ჭიჭინაძე პარტიიდან გარიცხეს. პარტიის ოფიციალურ განცხადებაში ნათქვამია, რომ ჭიჭინაძემ შეურაცხყოფა მიაყენა პოლიტიკური გუნდის წევრებს და ზიანი მიაყენა პარტიის იმიჯსა და ინტერესებს.