ცხრა წლის დაჩი გულუა შინაგან საქმეთა მინისტრს, გიორგი გახარიას წერილით მიმართავს და სთხოვს, საგზაო ნიშნებზე ქალის ფიგურა დაამატოს. წერილს ბიჭის დედა Facebook-ზე აქვეყნებს.

დაჩი ფიქრობს, რომ ეს ქალების უხილავი ჩაგვრაა. ცხრა წლის ბიჭი აღნიშნავს, რომ ქალები და კაცები ფეხითაც და მანქანითაც ერთნაირად დადიან და საგზაო ნიშნებზე ქალიც უნდა იყოს გამოსახული. წერილს ავტორი ხელს აწერს და მინისტრს სთხოვს, პასუხი დედის მეილზე მისწეროს.

On.ge დაჩის იმ მიზეზით ვერ გაესაუბრა, რომ ის სკოლაში იყო. დაჩის დედამ, ნათია ანასტასიადმა გვითხრა, რომ ბიჭი საგანზე მე და საზოგადოება გაეცნო ინფორმაციას იმის შესახებ, რომ ესპანეთში შუქნიშნებზე ქალის ფიგურა გამოსახეს. როგორც ბიჭის დედა ამბობს, დაჩიმ ამ საკითხზე ფიქრი და კითხვების დასმა დაიწყო. ასევე, მოიძია ინფორმაცია და გაარკვია, რომ ესპანეთის გარდა ამის მაგალითები ახალ ზელანდიაში, ჰოლანდიასა და კიდევ რამდენიმე ქვეყანაში არსებობს.

"შემდგომ ქალაქში ნიშნებს დააკვირდა და გაოცდა, ამ ნიშნებს ვუყურებთ და ვერ ვამჩნევთ, რომ აშკარად ყველაზე კაცია გამოსახულიო. გაარკვია, ვის ეხებოდა ეს საკითხი და წერილი მისწერა", — გვითხრა დაჩის დედამ.

ფოტო: Natia Anastasiadi / Facebook