საკონსტიტუციო სასამართლოში გიგი უგულავასა და ე.წ. კაბელების საქმის არსებითი განხილვა გუშინ, გვიან ღამით დასრულდა. სასამართლოს პლენუმმა მხარეების დასკვნითი სიტყვები მოისმა და სათათბიროდ გავიდა.

ჯერჯერობით უცნობია, როდის მიიღებს აღნიშნულ საქმეებზე სასამართლო გადაწყვეტილებას. გიგი უგულავას ადვოკატი, ბექა ბასილაია ამბობს, რომ სარჩელის დაკმაყოფილების შემთხვევაში, არა მხოლოდ უგულავა, არამედ ნებისმიერი პირი, ვინც არაკონსტიტუციური ნორმების საფუძველზეა მსჯავრდებული, უნდა გათავისუფლდეს:

"ქვეყნის ინტერესებიდანვე გამომდინარე, ამ ადამიანებს უნდა აღმოაჩნდეთ მინიმალურ დონეზე მაინც პროფესიული ღირსება, ჰუმანურობა და ამ ქვეყნისთვის მნიშვნელოვანი გადაწყვეტილება მიიღონ".

ე.წ. კაბელების საქმის ადვოკატი, სოსო ბარათაშვილი კი ამბობს, რომ მისი დაცვის ქვეშ მყოფთა პოზიცია სრულყოფილად არის დასაბუთებული:

"იმ მრავალრიცხოვან სამეცნიერო წყაროებზე მითითებით, სახალხო დამცველის დასკვნაშიც ასევე დეტალურად არის დეტალურად და დაწვრილებით არის აღწერილი ის გარემოებები, რომელიც საკონსტიტუციო სარჩელში არის მითითებული".

საკონსტიტუციო სასამართლოში გიგი უგულავასა და ე.წ. კაბელების საქმის პროცესი პირველ სექტემბერს უნდა გამართულიყო, თუმცა ჩაიშალა. საკონსტიტუციო სასამართლომ განცხადება გაავრცელა, რომელშიც სხდომის არჩატარების მიზეზებზე არაფერი იყო ნათქვამი.

ტელეკომპანია რუსთავი 2-ის მიერ მოპოვებული ინფორმაციით, საკონსტიტუციო სასამართლოს მოსამართლე ოთარ სიჭინავა, რომელსაც ბათუმში სხდომა უნდა ჩაეტარებინა, თბილისში იმყოფებოდა. კურიერმა ის იმ დროს გადაიღო, როდესაც მოსამართლე საკუთარ სახლთან ძაღლებს ასეირნებდა. ოთარ სიჭინავამ სასამართლო სხდომის ჩაშლის მიზეზები არ განმარტა.