ქართული ოცნების თავმჯდომარე, ბიძინა ივანიშვილი დარწმუნებულია, რომ ქართველი ხალხი დღესაც "სწორ არჩევანს" გააკეთებს. ამის შესახებ ივანიშვილმა მთაწმინდის მეოთხე უბანთან განაცხადა, სადაც ხმა მისცა.

მისი თქმით, აქტივობა მაღალია და ის დარწმუნებულია, რომ მთაწმინდაზეც და სხვა ოლქებშიც, ქართული ოცნების კანდიდატები დიდი უპირატესობით გაიმარჯვებენ. მისივე განცხადებით, მეორე ტურის ალბათობა ორ ოლქში არსებობს.

"დღევანდელი არჩევნები, თავისი მნიშვნელობით, ისევე როგორც ბოლო წლებში ქართველი ხალხის სწორი არჩევანით, ჩვენ მოვახერხებთ ჩვენი ქვეყანა ევროპისკენ სწორი მიმართულებით განვავითარებთ. მეორე ტურის ალბათობა ორ ოლქში არსებობს, თუმცა, უპირატესობა იქაც ჩვენი კანდიდატების დიდია და დიდი ალბათობით, პირველივე ტურში უნდა გაიმარჯვონ ქართული ოცნების კანდიდატებმა", — თქვა ივანიშვილმა.

მთაწმინდაზე ქართული ოცნების კანდიდატი ლადო კახაძეა. ოპოზიციიდან კენჭს შალვა შავგულიძე იყრის, რომელიც 2012 წელს კოალიცია ქართულ ოცნებას წარმოადგენდა.