რუსთავი 2-ის გენერალურმა დირექტორმა ნიკა გვარამიამ თავის ფეისბუქლაივში განაცხადა, რომ არჩევნების გაყალბების, მოსყიდვის ან ამომრჩევლის დაშანტაჟების ფაქტების წარდგენის შემთხვევაში, ნებისმიერი მოქალაქე რუსთავი 2-ისგან 1 000-ლარიან ჯილდოს მიიღებს.

"ყველა ადამიანს, ვის მოსყიდვასაც შეეცდებიან, ვისაც წაართმევენ პასპორტს ან სხვაგვარად შესთავაზებენ არჩევნების გაყალბებას, რუსთავი 2 სთავაზობს 1000-ლარიან ჯილდოს გაცხადებისთვის", — ამბობს ნიკა გვარამია.

რუსთავი 2-ის გენერალურმა დირექტორმა დაამატა, რომ ინფორმაცია რაიმე ფორმით უნდა იყოს დადასტურებული. მისი თქმით, ყველა, ვინც შეძლებს ფაქტების წარმოდგენას არჩევნების გაყალბების შესახებ, კომპანიისგან მიიღებს 1 000-ლარიან ჯილდოს.

"ყველა ადამიანი, რომელიც ეთერში მოიტანს ინფორმაციას, დადასტურებულს რაიმენაირი ფორმით, რომ მასზე ხორციელდება ზეწოლა არჩევნების გაყალბების მიზნით, რომ არჩევნები ყალბდება მისი მეშვეობით, ნებისმიერი ფორმით, ეს ადამიანი მიიღებს ჯილდოდ 1 000 ლარს რუსთავი 2-ისგან. ეს არის ოფიციალური განცხადება და ამას ვაცხადებ სრული პასუხისმგებლობით", — დაამატა გვარამიამ.

"ჩვენი დამოკიდებულება ასეთია, საარჩევნო ადმინისტრაციასა და „ქართული ოცნების“ ხელისუფლებას ვამხელთ არჩევნების გაყალბებაში და ამისთვის გვჭირდება მტკიცებულებები და ამ მტკიცებულებების მოპოვებისთვის 1 000-ლარიან ჯილდოს ვაცხადებთ. ქართული სახელმწიფოს წარმატებისთვის იმუშავეთ და მოიპოვეთ თავისუფლება ჩვენთან ერთად", - ამბობს რუსთავი 2-ის გენერალური დირექტორი.