შინაგან საქმეთა სამინისტროს განმარტებით, კაცზე, რომელმაც, სავარაუდოდ, ზუგდიდის საკრებულოს ქართული ოცნების დეპუტატი გია დანელია ფარულად ჩაწერა, სამართალდამცავები არ ძალადობენ.

იმის მიუხედავად, რომ შინაგან საქმეთა სამინისტრო ზეწოლას უარყოფს, ჩანაწერის ავტორმა, ბადურ რაფავამ ვიდეომასალის გავრცელებიდან რამდენიმე დღეში, 17 მაისს საქართველო დატოვა. ინფორმაციას ადასტურებს შსს-ც.

ფარული ვიდეოჩანაწერი, რომელშიც არჩევნებში ამომრჩევლის მოსყიდვაზე, დაშინებასა და ე.წ. მაყურებლების ჩართვაზეა საუბარი რუსთავი 2-მა გაავრცელა. ვიდეოს ჩაწერის თარიღი უცნობია, თუმცა, საუბრის შინაარსიდან გამომდინარე წინასაარჩევნო პერიოდშია გადაღებული. სავარაუდოდ, დანელია ამბობს, რომ თბილისიდან ჩასულ წარმომადგენლებს შეხვდა და მიიღო დავალება ყველა მეთოდიც მიიღონ ხმები. კერძოდ, მოსყიდვით და გატაცებით.

"— მოსყიდვა. — მოისყიდეთო. — გასატაცებელია. — ყველაფერზე თანხმობაა გაცემულიო", — ამ სიტყვებს, სავარაუდოდ, ზუგდიდის საკრებულოს ქართული ოცნების დეპუტატი გია დანელია ამბობს.