გაერთიანებული ოპოზიციის წევრის, ლევან ბეჟაშვილის თქმით, ქართული ოცნების შტაბი არჩევნების გაყალბების მიზნით ადმინისტრაციული რესურსზე სერიოზულ დავალებებს გასცემს. ამის შესახებ მან შემაჯამებელ ბრიფინგზე თქვა.

"გვაქვს ინფორმაცია, რომ ავალებენ, როგორც მასწავლებლებს, ისე საჯარო მოხელეებს ბიულეტინების შემოხაზვის შემდეგ კაბინიდან გამოსვლის დროს ბიულეტენები აჩვენონ, რაც არის კანონდარღვევა. გვინდა, თითოეულ ამომრჩეველს მოვუწოდოთ, ვინც ასეთ ზეწოლას დაექვემდებარება, რომ საარჩევნო კოდექსის შესაბამისად ასეთი ქმედება ჩაითვლება აგიტაციად და 200 ლარიანი ჯარიმა შეიძლება იყოს დაკისრებული, მათ შორის კომისიის წევრებზე, რომლებიც დაუშვებენ ასეთი ტიპის აგიტაციას საარჩევნო უბნებზე", — განაცხადა ბეჟაშვილმა.

მან მოუწოდა ამომრჩეველს ყურადღება მიაქციონ, მოაწერენ თუ არა ბიულეტებზე ხელს და დაარტყამენ თუ არა ბეჭედს საარჩევნო კომისიის წევრები.

"ეს აპრობირებული მეთოდია, როცა იციან ამა თუ იმ ამომრჩევლის პოლიტიკური შეხედულება ბიულეტენებს ხელს არ აწერენ", — განაცხადა ბეჟაშვილმა.

მისივე თქმით, აქვთ ინფორმაცია, რომ ცენტრალურ საარჩევნო კომისიის შემუშავებული აქვს ფორმა და სია, თუ რა დროს და ვინ უნდა გააძევონ საარჩევნო უბნიდან.

"მოვუწოდებთ ცენტრალურ საარჩევნო და საოლქო საარჩევნო კომისიას, გამოაქვეყნონ პირობები, რა შემთხვევაში იქნება გამოყენებული გაძევების აქტი", — განაცხადა ბეჟაშვილმა.

მან მოუწოდა თამარ ჟვანიას, ჩავიდეს ზუგდიდში, რადგან იქ არის ყველაზე ცხელი წერტილი.