ეკონომიკის ყოფილი მინისტრი, გიორგი ქობულია ამბობს, რომ ანაკლიის პროექტის ქვეყნისთვის მნიშვნელოვანია, თუმცა მას კომერციული პრობლემები აქვს.

"შესაძლებელი პოლიტიკური პრობლემების გარდა, აქვს სერიოზული კომერციული პრობლემები, რაც არაერთხელ მითქვამს. ჩვენ ამაზე არ უნდა არ დავხუჭოთ თვალი, ყველაფერს ნუ გადავიყვანთ პოლიტიკურ ჭრილში", — განაცხადა ქობულიამ.

2016 წელს ანაკლიის განვითარების კონსორციუმმა და სახელმწიფომ ერთობლივად დაიწყეს პროექტზე მუშაობა. ანაკლიის განვითარების კონსორციუმში შედის თიბისი ჰოლდინგ საქართველო. პროექტის მიხედვით, სამუშაოების სრულად დასრულების შემდეგ, ის 3 000 ჰექტარზე მეტ ფართობზე იქნება გაშლილი, რომელსაც 32 ნავმისადგომი ექნება. ანაკლიის პორტის გამტარუნარიანობა, წელიწადში, 100 მლნ ტონა იქნება. პორტი ოკუპირებული ტერიტორიებიდან რამდენიმე ათეული კილომეტრითაა დაშორებული.

დღეს, 15 მაისს, გიორგი ქობულია პარლამენტში დამოუკიდებელი და ქართული ოცნების დეპუტატების ნაწილის თხოვნით მივიდა. ეკონომიკის ყოფილი მინისტრი საკუთარ საქმიანობას აფასებს და დაინტერესებული პირების კითხვებს პასუხობს.

პრემიერ-მინისტრმა, მამუკა ბახტაძემ გიორგი ქობულიას გათავისუფლების შესახებ ბრძანებას ხელი 18 აპრილს მოაწერა. 4 მაისს შაბათის კურიერში გავიდა ქობულიას კომენტარი, სადაც ის ამბობდა, რომ თანამდებობა თავისი ნებით არ დაუტოვებია.