ჯანდაცვის სამინისტროდან საჯარო ინფორმაციის სახით გამოთხოვილი ანგარიშიდან ირკვევა, რომ 2019 წლის იანვრიდან 18 აპრილამდე პერიოდში შრომის ინსპექტირების დეპარტამენტმა 261 ობიექტი შეამოწმა, აქედან, 18 განმეორებით. შემოწმებების შედეგად სისტემური ხასიათის დარღვევები გამოიკვეთა.

ფოტო: ჯანდაცვის სამინისტრო

ამავე ანგარიშის მიხედვით, "ობიექტებზე არ არის შრომის უსაფრთხოების მართვის გამართული სისტემა". სულ გამოვლინდა 1000-ზე მეტი დარღვევა.

დარღვევათა პროცენტული განაწილება

ფოტო: ჯანდაცვის სამინისტრო

  • 11 პროცენტი ნაწილდება რისკების შეუფასებლობაზე;
  • 10 პროცენტი — უსაფრთხოების სერტიფიცირებული სპეციალისტის არ ყოლა და ინდივიდუალური დაცვის საშუალებების უქონლობა/ გამოუყენებლობა;
  • 9 პროცენტი — ალკოჰოლის უკონტროლობა, კოლექტიური დაცვის საშუალებების უგულებელყოფა, პირველადი სამედიცინო დახმარების უზრუნველყოფისთვის მოუმზადებლობა;
  • 8 პროცენტი — სწავლება/ტრენინგების ჩაუტარებლობა, მიკროკლიმატის უკონტროლობა;
  • 7 პროცენტი — მანქანა-დანადგარების უსაფრთხოების უკონტროლობა;
  • 5 პროცენტი — უბედური შემთხვევის დაზღვევის უქონლობა;
  • 3 პროცენტი — სწავლების გეგმის უქონლობა, მომეტებული ხმაური;
  • 2 პროცენტი — მაღალი წნევის ბალონების განთავსების წესის დარღვევა;
  • 1 პროცენტი — კუსტარული დანადგარების გამოყენება.

გონივრული ვადის გასვლის შემდეგ რეინსპექტირება გაცემულ მითითებებზე რეაგირების გადამოწმების მიზნით განხორციელდა 18 ობიექტზე. ოთხმა სრულად გაითვალისწინა მითითებები, ხოლო 14-ს ადმინისტრაციული სახდელის ზომად ჯარიმა დაეკისრა 1000 - 8000 ლარის ფარგლებში.

სხვადასხვა სახის ჯარიმა კანონის მოთხოვნების დარღვევისთვის

ფოტო: ჯანდაცვის სამინისტრო

მშენებლობებზე შრომის უსაფრთხოების ნორმების დარღვევისთვის სასამართლოს შუამდგომლობით მიემართა 22-ჯერ. მიმართვის მოტივი სამუშაო პროცესების/სამუშაო უბნის შეჩერებისა და ინსპექტირების განხორციელების მოთხოვნა იყო. აქედან, 10 ობიექტზე მიზეზი უბედური შემთხვევა იყო. 22-ვე შემთხვევაში შუამდგომლობა დაკმაყოფილდა. აღნიშნული ობიექტებიდან სულ შეჩერდა 15 ობიექტი.

2019 წლის პირველი იანვრიდან 18 აპრილამდე პერიოდში საწარმოში მომხდარი უბედური შემთხვევის შედეგად დაიღუპა 15 და დაშავდა 18 დასაქმებული.

ფოტო: ჯანდაცვის სამინისტრო

ფოტო: ჯანდაცვის სამინისტრო