ყოფილმა პრემიერმა, ბიძინა ივანიშვილმა, გადაცემაში შეხვედრები რეგიონულ მედიასთან საუბრისას განაცხადა, რომ თუ ნაციონალური მოძრაობა რევოლუციის მოწყობას ეცდება, მათ შეიძლება ის მიიღონ, "რაც არ მომხდარა".

აღნიშნულ კონტექსტში ექსპრემიერი ნიურნბერგის პროცესს გულისხმობდა, რომლის დროსაც საერთაშორისო სასამართლომ მეორე მსოფლიო ომში დამარცხებული სახელმწიფოს გერმანიის უმაღლესი პოლიტიკური და სამხედრო პირები გაასამართლა.

"შეხვედრა მქონდა ჩემთვის საპატივსაცემო პიროვნებასთან, ირაკლი სესიაშვილთან, ის ხმები რაც მოდის, რომ ფიქრობენ ისევ რევოლუციის მოხდენას, და ამის რესურსი არ აქვთ, აქვე დავაწყნარებ მოსახლეობას, მაგრამ, აქვე მივანიშნებ და მოსახლეობასაც მინდა შევახსენო, თუ ისინი მართლაც გაბედავენ რამე სერიოზულ პროვოკაციას მოახერხებენ, რაც არ მომხდარა შეიძლება ის მიიღონ.

შეიძლება მოსახლეობას ჩვენ წინ ვეღარ დავუდგეთ და მოგვიწიოს მთლიანად ამ პარტიაზე საუბარი, რაც იქნება ძალიან ცუდი და ძალიან მძიმე. ცუდი იქნება ქვეყნის იმიჯისთვის და მძიმე იქნება მათთვის. მე ამას პირობითად ვლაპარაკობ, მე ამის მომხრე არ ვარ, ისინიც ჩვენი თანამოქალაქეები არიან.

კაცის მკვლელებზეც უამრავი ტესტი არსებობს, რომ მათ დაუბრუნონ ის, რაც პოზიტიურია ადამიანში და საზოგადოების სამსახურში ჩააყენონ. ვიღაც რომ იმიტომ უნდა დავსაჯოთ, რომ ნაციონალური მოძრაობის წევრი იყო, ამ მიმართულებით წასვლა არ აწყობს საზოგადოებას და ქვეყანას".

შეხვედრები რეგიონულ მედიასთან - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერმინისტრი, ბიძინა ივანიშვილი მონაწილეობს. გადაცემას 20:30-ის ჟურნალისტები ნათია თოიძე და მიხეილ ფეიქრიშვილი უძღვებიან.