10 მაისს 19:00 საათზე საქართველოს პარლამენტის ეროვნულ ბიბლიოთეკაში მე-14 საერთაშორისო ფესტივალის, აღდგომიდან ამაღლებამდე-ს ფარგლებში გაიმართება ლიტერატურულ-მუსიკალური საღამო, სახელად გურია.

ეროვნული ბიბლიოთეკა წელს პირველად მონაწილეობს ამ უკვე პოპულარულ ფესტივალში, რომლის სამხატვრო ხელმძღვანელი გახლავთ იტალიაში მოღვაწე მსოფლიოში სახელმოხვეჭილი სოპრანო იანო ალიბეგაშვილი, საპატიო სამხატვრო მრჩეველი კი — ბრწყინვალე შემსრულებელი ალექსანდრე კორსანტია. ფესტივალის დირექტორები, ორგანიზატორები და სულისჩამდგმელები ქალბატონები მანანა ხვედელიძე და ირინე სახმბერიძე არიან.

ეროვნულ ბიბლიოთეკაში დაგეგმილ ლიტერატურულ-მუსიკალურ კომპოზიციას გახსნის ლევან კოღუაშვილისა და გიორგი კეკელიძის ფილმისათვის შექმნილი დოკუმენტური ჩანახატის საპრემიერო ჩვენება; სამუშაო ვერსიის პირობითი სახელწოდება გახლავთ გურია.

საღამოს სახელწოდებიდანაც ჩანს, რომ იქნება ყველაფერი მხოლოდ გურიასა და გურულებზე. ეროვნული ბიბლიოთეკის გენერალური დირექტორი, მწერალი გიორგი კეკელიძე ამ ულამაზესი კუთხის წეს-ჩვეულებებს, ისტორიასა და მნიშვნელობაზე გიამბობთ.

რეჟისორ ირაკლი მახარაძის ფოტოკოლექციასთან ერთად დამთვალიერებელი იხილავს მის მიერ შექმნილ ქანდაკებებსა და რეჟისორის მიერ გურულებზე გადაღებული ფილმების ვიდეოინსტალაციას.

პირველი ქართული გრავიორის, გრიგოლ ტატიშვილის „ჩართული ანბანის“ ნიმუშების ექსპოზიცია კი ქართული ანბანის სილამაზეს და მრავალფეროვნებას შეგახსენებთ.

საღამოს გააერთიანებს და შეავსებს ანჩისხატის მგალობელთა ტრიოს (დავით შუღლიაშვილი, დავით ცერცვაძე, დავით კოლელიშვილი) მიერ შესრულებული სააღდგომო საგალობლები და გურული სიმღერები.