პერსონალურ მონაცემთა დაცვის აპარატმა აჭარის ტელევიზიის ყოფილი დირექტორის, ნათია კაპანაძის ფარული კადრების გავრცელებაზე მოკვლევა დაიწყო. ამის შესახებ On.ge-ს აპარატში განუცხადეს. აპარატს განცხადებით აჭარის ტელევიზიამ მიმართა.

ნათია კაპანაძისა და ოპერატორების შეხვედრის ჩანაწერი გუშინ, პირველ მაისს გავრცელდა. ფეისბუქგვერდები, რომლებიც სახელისუფლებო მესიჯებს ატარებენ და ოპოზიციის დისკრედიტაციას ეწევიან, წერენ, რომ კაპანაძე თანამშრომლებს უხეშად ექცევა, ხელს კრავს მათ და ჩანს, რომ ის ტელევიზიის დირექტორობას არ იმსახურებდა. კაპანაძე ამბობს, რომ შეხვედრა, რომლის ჩანაწერიც გავრცელდა, საქმიან ფორმატს არ სცდებოდა.

ნათია კაპანაძე აცხადებს, რომ თანამშრომლებთან თათბირის ჩანაწერი, რომელიც სოციალურ ქსელში გავრცელდა, არის მორიგი დადასტურება, თუ რა მეთოდებით იბრძვიან მაუწყებლის წინააღმდეგ. მისივე თქმით, ამ ვიდეოს გავრცელება პერსონალური მონაცემების დარღვევაა.

კაპანაძემ აღნიშნა, რომ ამ რეალობაში მისთვის ჩანაწერის გავრცელება გასაკვირი არ არის. მისი თქმით, იცოდა რა გარემოში მუშაობდა და ისიც, თუ როგორ ხდება მიყურადება საქართველოში. მისივე თქმით, ვიდეო ტელევიზიის შიდა კამერითაა ჩაწერილი.