საქართველოს შინაგან საქმეთა მინისტრის, გიორგი გახარიას განცხადებით, ვერავინ, ვერასოდეს, პოლიციის კანონიერ ქმედებას ვერ შეზღუდავს საქართველოს იურისდიქციის ქვეშ მყოფ ვერც ერთ ტერიტორიაზე. ამის შესახებ მან პარლამენტის პლენარულ სხდომაზე მინისტრის საათის ფარგლებში განაცხადა.

მისივე თქმით, არის გარკვეული მცდელობები, შეზღუდონ პოლიციის არეალის ქმედებები, "თემები, გეოგრაფიული განზომილებები, კლუბები და სხვადასხვა სახის მცნებები".

"ვერავინ, ვერასდროს, პოლიციის კანონიერ ქმედებას ვერ შეზღუდავს საქართველოს იურისდიქციის ქვეშ მყოფ ვერც ერთ ტერიტორიაზე. შესაბამისად, ყველას უნდა გვესმოდეს, რომ პოლიციის კანონიერი ქმედება ვერ შეიზღუდება ვერასდროს და ვერსად", — განაცხადა მან.

მან ასევე მოქალაქეებს მოუწოდა, რომ "განსაკუთრებით ისეთ სენსიტიურ თემებში, როგორიცაა საოკუპაციო ზოლი, თუნდაც საზღვარი — უფრო პასუხისმგებლობით მოეკიდონ ქმედებებს".

"ქვეყნის უსაფრთხოება არა არის მხოლოდ და მხოლოდ რომელიმე ერთი სოციალური ჯგუფის, ადამიანთა ჯგუფის ინტერესში. ქვეყნის უსაფრთხოება დგას ყველანაირ პოლიტიკურ ინტერესზე უფრო მაღლა", — განაცხადა გიორგი გახარიამ.

პანკისში მომხდარი დაპირისპირების შემდეგ არასამთავრობო სექტორის ნაწილი შინაგან საქმეთა სამინისტროს ძალის გადამეტებასა და სპეცრაზმის ხეობაში შეყვანის გამო აკრიტიკებდა. პანკისის ხეობაში მომხდარი დაპირისპირების შედეგად დაშავდნენ როგორც პოლიციელები, ისე ადგილობრივი მაცხოვრებლებლები. სპეცრაზმი პანკისის მაცხოვრებლებს რეზინის ტყვიებით და ცრემლსადენი გაზით დაუპირისპირდა. ადგილობრივებმა კი სპეციალურ დანაყოფებს ქვები და ხელკეტები დაუშინეს, დაწვეს პოლიციის მანქანებიც.

გაიგე მეტი: რას ეწინააღმდეგებიან პანკისში — ყველაფერი მოკლედ