საქართველოს პრეზიდენტმა, სალომე ზურაბიშვილმა ამერიკის ხმასთან ინტერვიუში თქვა, რომ საქართველოში ამერიკული სამხედრო ბაზის აშენება, შესაძლოა, პროვოკაციად იქნას აღქმული. ზურაბიშვილმა განაცხადა, რომ მას "არ ჰგონია", საქართველოში ამერიკული ბაზის აშენება რეკომენდირებული იყოს.

გია ვოლსკი

ფოტო: ტაბულა

ზურაბიშვილის ამ განცხადებას არაერთგვაროვანი რეაქციები მოჰყვა. მმართველი გუნდის წევრი, გია ვოლსკი ფიქრობს, რომ ამერიკული ბაზის მშენებლობაზე სალომე ზურაბიშვილის შეხედულებები არანაირად არ უპირისპირდება საგარეო კურსის ძირითად მიმართულებას. მისივე თქმით, არის გარკვეული მოსაზრებები, რომელშიც პრეზიდენტს შეიძლება, თავისი კურსი ან ხედვა ჰქონდეს.

"სალომე ზურაბიშვილის განცხადებას არ გავშიფრავდი ისე, რომ რაიმე წინააღმდეგობა არსებობს ჩვენს საგარეო კურსსა და მის განცხადებებს შორის... მთლიანად, გლობალური მასშტაბით თუ ავიღებთ, შეხედულებებს თუ გავაანალიზებთ, რასაკვირველია, კურსი ერთია, ეს არის ევროატლანტიკური ინტეგრაცია და არც სალომე დგას ამ კურსიდან შორს, ერთი და ნახევარი ნაბიჯითაც კი", — ამბობს ვოლსკი.

თამარ ჩუგოშვილი

ფოტო: საქართველოს პარლამენტი

პარლამენტის ვიცე-სპიკერი, თამარ ჩუგოშვილი ამბობს, რომ ამ საკითხის დღის წესრიგში დაყენება საჭირო არ იყო. მას ჰგონია, რომ ამ თემის განხილვა "კარგი არ არის".

"როგორც ვიცი, არანაირი მსჯელობა ან განხილვა ამ თემის არ მიმდინარეობს. ამერიკული ბაზების საკითხი დღის წესრიგი არ დგას და არ მგონია, რომ ამას დიდი დისკუსია უნდა მივუძღვნათ. თუმცა, ამერიკის შეერთებულ შტატებთან ნებისმიერ სამხედრო თანამშროლობა ჩვენი ქვეყნის პრიორიტეტია. ეს ქვეყანა ჩვენი მთავარი პარტნიორი და მხარდამჭერია", — თქვა ჩუგოშვილმა.

თინა ბოკუჩავა

ფოტო: საქართველოს პარლამენტი

ნაციონალური მოძრაობის წევრი, თინა ბოკუჩავა ფიქრობს, რომ საქართველოზე ომის დაწყების დაბრალებასთან ერთად, ეს "ივანიშვილის მიერ ხელდასმული პრეზიდენტის" ყველაზე სკანდალური განცხადებაა.

"ეს არის ერთ-ერთში პუტინის ნარატივის გამეორება, ეს არის რუსული პროპაგანდის ტირაჟირება... დღითიდღე ვრწმუნდები, რომ ეს ქალი იმპიჩმენტით დაასრულებს. თუმცა ახლა მნიშვნელოვნია, რომ იმპიჩმენტამდე მან ქვეყანას ასეთი განცხადებებით გამოუსწორებელი ზიანი არ მიაყენოს", — აღნიშნავს ბოკუჩავა.

დავით ბაქრაძე

ფოტო: საქართველოს პარლამენტი

ევროპული საქართველოს ლიდერი, დავით ბაქრაძე ამბობს, რომ საქართველოში ამერიკული და ზოგადად, დასავლური სამხედრო ძალების არსებობა ქვეყნის უსაფრთხო მომავლის გარანტიაა. გარდა ამისა, ეს იქნება ვალდებულება, როცა ქვეყანა ნატოს წევრი გახდება. შესაბამისად, ბაქრაძე ამბობს, რომ ზურაბიშვილის განცხადება ნატოში საქართველოს მომავალ ვალდებულებებს ეწინააღმდეგება.

"ეს არის ის განცხადება, რომელიც პირდაპირ ასხამს წყალს რუსეთის წისქვილზე, რომ საქართველო არ უნდა იყოს დასავლური უსაფრთხოების სისტემის წევრი, რომ საქართველოში არ უნდა იდგნენ მეგობარი სახელმწიფოს დამცველი შეიარაღებული ძალები და ეს ქვეყანა უნდა იყოს ოკუპანტი რუსის ჯარის ამარა", — ამბობს ბაქრაძე.