"ახლადაღმოცენებულო ტროლო, მე და უკრაინელები თავად გავერკვევით", — ასე ეხმაურება საქართველოს ყოფილი პრეზიდენტი, მიხეილ სააკაშვილი რუსეთის პრეზიდენტის, ვლადიმერ პუტინის განცხადებას. პუტინმა უკრაინის არჩეულ პრეზიდენტს, ვოლოდიმირ ზელენსკის ურჩია, სააკაშვილს უკრაინის მოქალაქეობა დაუბრუნოს.

"ვლადიმერ ვლადიმერის ძევ, საკმარისად კარგად ვიცნობ ამ მანევრს, რომლითაც თქვენს ორმაგ სტანდარტებს წარმოაჩენთ — მოსთხოვოთ ოპონენტს, რომელმაც ასე მძლავრად უპასუხა თქვენს ინიციატივას რუსულ პასპორტებთან დაკავშირებით, ქვეყანაში დამაბრუნოს იმ იმედით, რომ მას შეეშინდება. ეს თქვენი საქმე უკვე აღარაა", — წერს სააკაშვილი Facebook-ის პირად გვერდზე.

სააკაშვილი აღნიშნავს, რომ პუტინი საკუთარ ტოქსიკურობას მტრის "გასასვრელად" იყენებს და ეს ხერხი ყველასთვის ნაცნობია. ამ შემთხვევაში კი, უკრაინელების სიძულვილს იარაღად იყენებს.

"ვინ ურჩევს უკრაინის მომავალ პრეზიდენტს, მოქალაქეობა დამიბრუნოს? პუტინი? იგივე პუტინი, რომელმაც 2017 წლის დეკემბერში პრესკონფერენციაზე მოისთხოვა პოროშენკოს, უკრაინიდან გავეგდე? (რაც მან შემდეგ თვეში შეასრულა). ზუსტად ასეთივე მოთხოვნა, არ შევეშვი ქვეყანაში, თქვენ არა მხოლოდ საქართველოს წაუყენეთ, არამედ თურქეთს, სომხეთსა და აზერბაიჯანს. ჩემი ინფორმაციით, სწორედ ეს განიხილეთ 2016 წელს ერდოღანთან შეხვედრისას", — წერს სააკაშვილი.