რუსი ბაიკერების კოლონა საქართველოში არ შემოუშვეს. ამის შესახებ ინფორმაცია თავდაპირველად საზოგადოებრივმა მაუწყებელმა გამოცემა Eurasia Daily-ზე დაყრდნობით გაავრცელა. ინფორმაცია On.ge-ს შინაგან საქმეთა სამინისტროში დაუდასტურეს. მათი ცნობით, კოლონა ზემო ლარსის გამშვებ პუნქტზე გააჩერეს.

უწყების ინფორმაციით, მათ უარი უცხოელთა და მოქალაქეობის არმქონე პირთა სამართლებრივი მდგომარეობის შესახებ საქართველოს კანონის მე-11 მუხლის "თ" ქვეპუნქტის საფუძველზე ეთქვათ. ამ მუხლის მიხედვით, უცხოელს საქართველოში შემოსვლაზე უარი შეიძლება ეთქვას, თუ იგი არ იძლევა ინფორმაციას ან იძლევა ყალბ ინფორმაციას თავისი პიროვნებისა და მგზავრობის მიზნის შესახებ.

რუსული გამოცემის ცნობით, კოლონაში 30-ზე მეტი ბაიკერი იყო. ისინი სალონიკში მიემგზავრებოდნენ, სადაც 1-2 მაისს შეკრებაა დაგეგმილი. ერთ-ერთი ბაიკერის ინფორმაციით, მათ საქართველოს ტერიტორიაზე ტრანზიტიც აუკრძალეს.