ე.წ. ციანიდის საქმის მსჯავრდებულის, დეკანოზ გიორგი მამალაძის ძმა, თორნიკე მამალაძე ამბობს, რომ საპატრიარქოს წარმომადგენელმა მის ძმას შეწყალების სანაცვლოდ წერილის დაწერა მოსთხოვა. მისივე თქმით, ამ წერილში დეკანოზს უნდა აღენიშნა, რომ შორენა თეთრუაშვილი საქმის უკან არ დგას.

"საპატრიარქოს წარმომადგენელი გამოვიდა და მითხრა, რომ უკვე პრაქტიკულად ყველაფერი გადაწყვეტილია, მან მითხრა, რომ მე უკვე შემეძლო კარვის აღება, იმიტომ, რომ ჩემი ძმის შეწყალება უკვე გადაწყვეტილი იყო და მითხრა, რომ ბურთი თქვენს მოედანზეაო, როგორც გააგორებთ, სიტუაცია ისე წავაო", — აღნიშნა თორნიკე მამალაძემ TV პირველთან და თქვა, რომ სასულიერო პირმა გარიგებაზე უარი თქვა.

ტელეკომპანიასთან ქორეპისკოპოსმა იაკობმა თქვა, რომ საქმის კურსში არაა:

"იმას თავი გავანებოთ რას ედავება სახელმწიფო. ეკლესიის წინააღმდეგ და კონკრეტული პიროვნებების წინააღმდეგ რასაც აკეთებს, ხო, უნდა გამოვიდეს და ტყუილებისთვის ბოდიშები უნდა მოიხადოს".

გიორგი მამალაძის ოჯახმა პრეზიდენტს შეწყალების თაობაზე მარტში მიმართა. თორნიკე მამალაძემ ითხოვა, რომ პატრიარქ ილია მეორეს პრეზიდენტისთვის დეკანოზის შეწყალებით მიემართა.

საპასუხო განცხადებაში საპატრიარქომ აღნიშნა, რომ დეკანოზ გიორგი მამალაძის შეწყალებაზე შუამავლობას იმ შემთხვევაში აღძრავენ, თუ სასულიერო პირი ბრალს აღიარებს. საპატრიარქო განმარტავს, რომ შეწყალების შუამდგომლობით მხოლოდ იმ შემთხვევაში მიმართავს, თუ მსჯავრდებული დანაშაულს აღიარებს და ინანიებს.

ციანიდის საქმე

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

2018 წლის 13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.