მას შემდეგ, რაც GOT-მა დღის სინათლე იხილა, დღე არ გავა რომ ერთმანეთზე საინტერესო თეორიები არ მოვისმინოთ იმასთან დაკავშირებით, თუ როგორ დასრულდება ბრძოლა შვიდი სამეფოსთვის.

დღეს ერთ-ერთ ასეთ თეორიას წარმოგიდგენთ, რომლიც ღამის მეფის სამომავლო გეგმებს "გვაცნობს" და რომლის მიხედვითაც, სერსეი ლანისტერს და კინგს ლენდინგს კარგი დღე არ უწერია.

როგორც იცით, ღამის მეფის არმია ვინტერფელზე თავდასხმისთვის ემზადება. თუმცა, თუ მერვე სეზონის მეორე სერია ნახეთ, შეამჩნევდით, რომ თავად ღამის მეფე არმიასთან ერთად არ იყო.

იმ თეორიის მიხედვით კი, რომელსაც ახლა გაგაცნობთ, ღამის მეფე ვინტერფელის ნაცვლად, თავისი დრაკონით მეფის სავანისკენ გაფრინდა.

როგორც იცით, მეფეს მხოლოდ ერთი დრაკონი ჰყავს და ამ თეორიის მომხრეები ირწმუნებიან, რომ ის სულაც არ არის ისეთი შტერი, რომ დეინერისის ორ დრაკონს დაუპირისპირდეს.

გარდა ამისა, როგორც ცნობილია, კინგს ლენდინგში მილიონამდე ადამიანი ცხოვრობს, ამას ემატება ოქროს კომპანიის არმია და ცხენები. შესაბამისად, ღამის მეფეს სურს სერსეის ჯარი დაამარცხოს, მოქალაქეები დახოცოს და შემდეგ ის მკვდრების არმიას შეუერთოს.

ამ თეორიის უფრო მეტად დაჯერებაში კი რამდენიმე ფაქტიც გვეხმარება. მაგალითად, მეორე სეზონის მეათე ეპიზოდის ერთ-ერთ სცენაში დეინერის ტარგარიენს ხილვა ჰქონდა. ამ ხილვაში კინგს ლენდინგი და მეფის სასახლე განადგურებული იყო. ამასთანავე, მთელი ქალაქი დაფარული იყო თოვლით.

გავიხსენოთ მეოთხე სეზონის მეორე სერიაც, სადაც ბრან სტარკმა კინგს ლენდინგის თავზე მფრინავი დრაკონი შენიშნა.

ამ ყველაფრიდან გამომდინარე, ეს თეორია ღამის მეფის გეგმების შესახებ ჯერჯერობით ყველაზე დამაჯერებელია. ჩვენ კი ისღა დაგვრჩენია, GOT-ის შემდეგ სერიებს დაველოდოთ და გავიგოთ, ბოლოს და ბოლოს ვინ დაჯდება რკინის ტახტზე.