უკრაინის საპრეზიდენტო არჩევნებში ვოლოდიმირ ზელენსკიმ თბილისის საარჩევნო უბანზეც გაიმარჯვა. როგორც უკრაინის ცენტრალური საარჩევნო კომისიის ვებგვერდზე წერია, უბანზე 389 ადამიანი მივიდა და მათგან 50,38-მა პროცენტმა ზელენსკის დაუჭირა მხარი. გარდა ამისა, ზელენსკიმ გაიმარჯვა აზერბაიჯანისა და სომხეთში.

ცესკოს ვებგვერდზე გამოქვეყნებული შედეგებით, საზღვარგარეთის უბნებზე პეტრო პოროშენკო ლიდერობს. მან ხმების 73,76 პროცენტი ამერიკის შეერთებულ შტატებში მოიპოვა.

21 აპრილს უკრაინაში საპრეზიდენტო არჩევნების მეორე ტური გაიმართა. ცესკოს წინასწარი შედეგებით, მსახიობმა ვოლოდიმირ ზელენსკიმ 73,15 პროცენტი მოიპოვა, ხოლო მოქმედმა პრეზიდენტმა, პეტრო პოროშენკომ — 24,52. ეგზიტპოლების გამოცხადების შემდეგ პოროშენკომ მარცხი აღიარა და ზელენსკის გამარჯვება მიულოცა. ზელენსკის გამარჯვება უკვე მიულოცეს დასავლეთის ქვეყნების ლიდერებმა, მათ შორის, საქართველოს პრემიერ-მინისტრმა მამუკა ბახტაძემ. რუსეთის ფედერაციიდან ზელენსკისთვის ჯერ არავის მიულოცავს.