შს მინისტრის, გიორგი გახარიას თქმით, მთავრობის წევრები პანკისის ხეობის უხუცესებთან საუბრისას შეთანხმდნენ, რომ "ახლა ყველა უნდა გაჩერდეს".

"დავწყნარდეთ, ამის მერე უნდა გავარკვიოთ სად შეგვეშალა, ვის შეგვეშალა, ვინ დამნაშავეა და ა.შ.", — თქვა გახარიამ და შეკრებილ მოსახლეობას მოუწოდა, რომ ლაპარაკი გაგრძელდება. შს მინისტრმა იქვე აღნიშნა ისიც, რომ თუ ვინმე გადავიდა და დაარღვია კანონი, "ეს ცალკე სალაპარაკოა".

შს მინისტრის პანკისის ხეობაში ჩასვლამდე ადგილზე ვითარება დაძაბული იყო. თელავში მოლაპარაკებების პარალელურად, პოლიციამ ადგილზე დამატებითი ძალები მიიყვანა და აქციის მონაწილეების წინააღმდეგ სპეციალური საშუალებები — ცრემლსადენი გაზი და რეზინის ტყვიები გამოიყენა.

მოგვიანებით გავრცელებულ განცხადებაში, შსს განმარტავს, რომ მოლაპარაკებების პარალელურად, ქვებით შეიარაღებულმა პირებმა პოლიციას კვლავ გაუწიეს წინააღმდეგობა და სწორედ ამიტომ "იძლებულები გახდნენ" დამატებითი ძალა გამოეყენებინათ. ადგილობრივების განცხადებით, ისინი ხეობაში დამატებითი ძალების შესვლამ გააღიზიანა, რამაც სიტუაცია კიდევ უფრო დაძაბა.

დღეს, 21 აპრილის დილას პანკისის ხეობაში, სოფელ ბირკიანში აქციის მონაწილეებსა და პოლიციას შორის დაპირისპირება მოხდა. სპეცრაზმმა აქციის მონაწილეების წინააღმდეგ ცრემლსადენი გაზი და რეზინის ტყვიები დილითაც გამოიყენა. ადგილობრივები ამბობენ, რომ ჰესების, კერძოდ მდინარე ალაზანზე "ხადორი 3"-ის მშენებლობის გაგრძელების უფლებას არავის მისცემენ. მათი თქმით, მშენებლობის შემთვევაში, ხეობის უნიკალური ეკოლოგიური სისტემისა და სოციალური გარემოს დაზიანების მაღალ რისკებია.