შინაგან საქმეთა სამინისტრო და მიგრაციის სამსახური საუდის არაბეთიდან გამოქცეულ დებს გამოკითხვას უტარებენ. როგორც სამინისტროში On.ge-ს უთხრეს, მათი თანამშრომლები ქალებთან საცხოვრებელ მისამართზე მივიდნენ.

"გააცნეს მათი უფლებები და რა შესაძლებლობები აქვთ საქართველოში. შემდგომი პროცედურები იქნება მათი სურვილის გათვალისწინებით", — განაცხადეს შინაგან საქმეთა სამინისტროში.

რამდენიმე დღის წინ ტვიტერზე გავრცელდა ვიდეო, სადაც საუდელი დები, მაჰა და ვაფა ალ-სუბაიები ამბობდნენ, რომ მშობლიურ ქვეყანაში მძიმე პირობებს გამოიქცნენ და საქართველოში ჩამოვიდნენ. ისინი ამბობენ, რომ საუდის არაბეთში დაბრუნების შემთხვევაში სიკვდილი ელით. ისინი დახმარებას გაეროს დევნილთა უმაღლეს კომისარიატსაც სთხოვენ.

"ჩვენ საუდელი დები ვართ, მე მაჰა მქვია, ჩემს დას ვაფა. ჩვენ საფრთხეში ვართ. გვჭირდება დაცვა და თქვენი მხარდაჭერა, რომ ჩვენი ხმა ყველამ გაიგოს. გვინდა ისეთი ქვეყანა, რომელიც მიგვიღებს და ჩვენს უფლებებს დაიცავს. გთხოვთ დაგვეხმაროთ! საუდის მთავრობამ პასპორტები გაგვიუქმა. ახლა ჩვენ საქართველოში ვართ".

გარდა ამისა ამბობენ, რომ საქართველოში უკვე ჩამოვიდნენ მისი მამა და ძმები, რომლებიც ეძებენ, თუმცა შინაგან საქმეთა სამინიშტროში ამბობენ, რომ ქალების ოჯახის წევრები საქართველოში არ იმყოფებიან.

უწყებაში აცხადებენ, რომ ინფორმაციის მიწოდების და შესაბამისი განმარტებების მიღების შემდგომ, ქალები დათანხმდნენ მიგრაციის დეპარტამენტის ლტოლვილთა საკითხების სამმართველოს მიმღებ ცენტრში გადაყვანას თავშესაფრის მაძიებლობისთვის პროცედურების გასავლელად.