ცხოველთა დაცვის ორგანიზაციამ ოთხი თათი ღაზაში მდებარე ზოოპარკიდან 47 ცხოველი უსაფრთხოდ გამოიყვანა.

"მწუხარების ზოოპარკი", - ასე უწოდებდა უამრავი ადამიანი კონფლიქტურ ზონაში არსებულ ადგილს, სადაც ცხოველები თვეების განმავლობაში წარმოუდგენლად მძიმე პირობებში იმყოფებოდნენ.

ფოტო: Abed Rahim Khatib / Getty Images

ცხოველები იორდანიაში მდებარე ნაკრძალში გადაიყვანეს. გადარჩენილთა შორის არიან ლომები, მაიმუნები, ფარშავანგები და მაჩვზღარბები.

ფოტო: Said Khatib / Getty Images

ცხოველების გადაყვანის უფლება ორგანიზაციას ისრაელმა მისცა. ტრანსპორტირების დროს, ისინი 300 კილომეტრს გაივლიან. გადარჩენილ ლომებს აფრიკის სამხრეთ ნაწილში გადაიყვანენ.

ფოტო: Majdi Fathi / Getty Images

"გალიები ცარიელია! ჩვენ ვიხსენით 47 ცხოველი რაფანის ზოოპარკიდან და ისინი ახალ სახლში მიდიან. მადლობა ყველას, ვინც მისიას მხარი დაუჭირა", - წერია ოთხი თათის ტვიტერზე.

1999 წელს გახსნილმა რაფანის ზოოპარკმა მედიის ყურადღება 2019 წლის იანვარში მიიპყრო, როცა ზოოპარკში დაბადებული ოთხი ლომის ბოკვერი სიცივისგან და საშინელ პირობებში ყოფნისგან დაიღუპა. იგივე თვეში, ცოცხალ ლომებს ბრჭყალები სეკატორით დააჭრეს.

ზოოპარკის მფლობელმა, ფაზი ჯომამ ისრაელი და ეგვიპტე დაადანაშაულა ღაზას ჩაკეტისთვის და ზოოპარკში არსებული ვითარება მძიმე ეკონომიკურ მდგომარეობას დააბრალა.

"შესაძლოა ერთი კვირის კნუტის დაკარგვამ უდიდესი მწუხარება მოგანიჭოს. რთული გადმოსაცემია ის გრძნობა, რომელიც იმ ცხოველების დაღუპვამ მომგვარა, რომლებთან ერთადაც 20 წელი ვცხოვრობდი", - განუცხადა ჯომამ როიტერსს. სწორედ მან სთხოვა დახმარება ცხოველთა დაცვის ორგანიზაციას.

ეს ღაზას რეგიონში მდებარე ერთადერთი ზოოპარკი არაა, რომელშიც ცხოველები უმძიმეს პირობებში აღმოჩნდნენ. 2016 წელს, პალესტინისა და ისრაელის კონფლიქტის პარალელურად, ღაზაში ზოოპარკი მიატოვეს, სადაც ცხოველები შიმშილით დაიხოცნენ.