შინაგან საქმეთა სამინისტროს ინფორმაციით, ნარკოტიკების ინტერნეტით რეალიზაციის საქმეზე 2 პირი დააკავეს. უწყების განცხადებით, ამოღებულია დიდი ოდენობით ნარკოტიკული საშუალებები: ემბაუმი, ექსტაზი, ჰაშიში და ე.წ. ბიო.

უწყებაში ამბობენ, რომ ერთ-ერთი დაკავებული ორგანიზებას უწევდა დანაშაულებრივ ჯგუფს, რომლებიც მის დროებით საცხოვრებელში ნარკოტიკულ საშუალებებს აფასოებდნენ და შემდგომ სპეციალურად შერჩეულ ლოკაციებზე მალავდნენ. მათი განმარტებით, დაჯგუფების წევრები აღნიშნული სამალავების მისამართებს ნარკოტიკული საშუალებების შეძენის მსურველ პირებს ატყობინებდნენ, რაშიც თანხას დისტანციური არხებით იღებდნენ.

შსს-ში ამბობენ, რომ თბილისის საქალაქო სასამართლომ ორივე ბრალდებულს აღკვეთის ღონისძიების სახით 2-თვიანი წინასწარი პატიმრობა შეუფარდა. გამოძიება დიდი ოდენობით ნარკოტიკული საშუალების უკანონო შეძენა-შენახვის, ასევე, წინასწარი შეთანხმებით ჯგუფის მიერ ნარკოტიკული საშუალების უკანონო გასაღების მცდელობის საქმეზე, სისხლის სამართლის კოდექსის 19-260-ე მუხლის მე-5 ნაწილის ბ ქვეპუნქტით, 260-ე მუხლის მე-3 ნაწილის ა ქვეპუნქტით, 260-ე მუხლის 1-ლი და მე-2 ნაწილებით მიმდინარეობს. დანაშაული 7-დან 14 წლამდე ვადით თავისუფლების აღკვეთას ითვალისწინებს.