კოალიცია ევროატლანტიკური საქართველოსთვის მოუწოდებს მთავრობას, გაასაჯაროვოს ასოცირების შესახებ შეთანხმების 2017-2019 წლების დღის წესრიგის საპროექტო ტექსტი იმისთვის, რომ სამოქალაქო საზოგადოების ორგანიზაციებს, რომლებიც დაინტერესებულები არიან ასოცირების შეთანხმების განხორციელების ხელშეწყობაში, საშუალება ჰქონდეთ იმსჯელონ და საჭიროებისამებრ წარმოადგინონ რეკომენდაციები მის გასაუმჯობესებლად:

"2014 წელს საქართველო-ევროკავშირის ასოცირების შესახებ შეთანხმების ხელმოწერის შემდეგ, მხარეებმა შეიმუშავეს, განხორციელების მრავალ წელზე გათვლილი შეთანხმების, პირველ სამ წელში განსახორციებელი 2014-2016 წლების დღის წესრიგი. ამ დღის წესრიგის შესაბამისად საქართველოს პრემიერმინისტრი ამტკიცებდა ყოველწლიურ სამოქმედო გეგმას განმახორციელებელი სახელმწიფო ინსტიტუტებისათვის. სამოქალაქო სექტორი, თავის მხრივ, საკუთარ მოსაზრებებს უზიარებდა საქართველოს მთავრობას დღის წესრიგის სამოქმედო გეგმების სავარაუდო შინაარსა და მის აღსრულებაზე".

ორგანიზაციის თქმით, საქართველო-ევროკავშირის ასოცირების შესახებ შეთანხმების განხორციელებაში სამოქალაქო სექტორის ჩართულობა განსაზღვრულია თავად შეთანხმებით და გამყარებულია საქართველოს ხელისუფლების პოზიტიური პრაქტიკით:

"ამგვარი პრაქტიკის ერთი მაგალიათია ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის მიერ ორგანიზებული 2016 წლის 8 აგვისტოს შეხვედრა, რომელშიც მონაწილეობდნენ სამოქალაქო ორგანიზაციებისა და სამინისტროების წარმომადგენლები. შეხვედრაზე საინტერესო დიალოგი გაიმართა ასოცირების 2017-2019 წლების დღის წესრიგის იმ საკითხებზე, რომლებზეც თავისი რეკომენდაციები მოამზადეს შეხვედრაზე დამსწრე სამოქალაქო ორგანიზაციებმა".