არასამთავრობო ორგანიზაცია საფარი 17 სექტემბერს, 14:00 საათზე, მთავარ პროკურატურასთან აქციას მართავს იმ პირთა დასჯის მოთხოვნით, რომლებიც მონაწილეობდნენ ხანუმ ჯეირანოვას ფიზიკურ შეურაცხყოფაში, რის შემდეგაც, მან თავი მოიკლა. შემთხვევა 2 წლის წინ, 18 სექტემბერს მოხდა.

თვითმკვლელობამდე კი ხანუმ ჯეირანოვა თანასოფლელმა კაცებმა იორმუღალოში საჯაროდ დაამცირეს, ქმრის ღალატში დასდეს ბრალი და მთელი სოფლის თვალწინ ჩამოატარეს ცემითა და გინებით. საფარის ცნობით, ეს ამბავი პოლიციამაც შეიტყო, გამგებელმაც, თუმცა გამოძიება არ დაწყებულა. ხანუმა მშობლების სახლში გაამწესეს, სადაც მან ღამით თავი ჩამოიხრჩო.

მას შემდეგ რაც გამოძიება მხოლოდ თვითმკვლელობამდე მიყვანის მუხლით დაიწყო, მაგრამ შედეგი არ მოჰყოლია, ხანუმას მეუღლემ, აჯი გასანოვმა ცეცხლსასროლი იარაღით დაჭრა ერთ-ერთი იმ კაცთაგანი, რომელმაც სახალხოდ შეურაცხყო მისი ცოლი. მას პატიმრობა მიუსაჯეს. ის კაცები კი, ვინც ხანუმას არაადამიანურად და დამამცირებლად მოექცნენ, დღემდე დაუსჯელები არიან.

არასამთავრობო ორგანიზაცია საფარი ასევე ავრცელებს ინფორმაციას, რომ პრეზიდენტმა მარგველაშვილმა ჯეირანოვას ქმარი შეიწყალა და ის პატიმრობიდან უკვე გათავისუფლდა.