საფრანგეთის სახელისუფლებო კამპანია Twitter-ში ქსელის ადმინისტრაციამ დაბლოკა. ქსელის ადმინისტრაცია ამის მიზეზად დეკემბერში საფრანგეთის ხელისუფლების მიერ მიღებული ანტისადეზინფორმაციო კანონმდებლობა დაასახელა. ინფორმაციას ამის შესახებ bbc ავრცელებს.

საუბარია სოციალურ კამპანიაზე "მე ვიყავი არჩევნებზე", რომელიც საფრანგეთის სახელმწიფო საინფორმაციო სამსახურმა ევროპარლამენტის არჩევნების პოპულარიზაციისთვის წამოიწყო. Twitter-ის ადმინისტრაციის განმარტებით, საფრანგეთის ახალი კანონის მიხედვით, სოციალური კამპანიის ორგანიზატორები ვალდებული არიან გაასაჯაროოონ დაფინანსების წყარო და მოცულობა.

მომხდარს ტვიტერზე გამოეხმაურა საფრანგეთის შინაგან საქმეთა მინისტრი, კრისტოფ კასტანერი.

"ტვიტერის პრიორიტეტი ტერორისტული და ექსტრემისტულ კონტენტთან ბრძოლა უნდა იყოს და არა — თავისუფალი ქვეყნის ელექტრონული სიების რეგისტრაცია", — ნათქვამია კასტანერის ტვიტში.

ახალი კანონმდებლობით, სოციალურ ქსელში ხელმისაწვდომი უნდა იყოს პოლიტიკური რეკლამის დამკვეთისა და დამფინანსებლის ვინაობა. ამასთან, ერთად სოციალურმა ქსელმა მაქსიმალურად უნდა შეუწყოს ხელი გადამოწმებული ინფორმაციის გავრცელებას და ინფორმაციის გამჭვირვალობას.

კანონის დამტკიცების შემდეგ სოციალურ ქსელებს ახალი საზრუნავი გაუჩნდათ. შესაბამისად, პრობლემების თავიდან არიდების მიზნით, არაერთი ახალი სოციალური კამპანია დაიბლოკა.