HBO-ს ყველაზე ტიტულოვანი სერიალი, სამეფო კარის თამაშები ფინალური სეზონით 14 აპრილს ბრუნდება.

სერიალთან დაკავშირებით ჯერ ბევრი არაფერია ცნობილი გარდა იმისა, რომ ის ტელევიზიის ისტორიაში ყველაზე მასშტაბური და სანახაობრივი იქნება.

HBO-მ კი სპოილერებისგან თავის ასარიდებლად დაცვის უპრეცედენტო მექანიზმებს მიმართა. თუ გავრცელებულ ხმებს დავუჯერებთ, არხმა ყალბი სერიებიც გადაიღო იმ შემთხვევისთვის, თუ გასული წელს მომხდარი განმეორდება და ვინმე სერვერიდან GOT-ის სერიის მოპარვას შეეცდება.

სპოილერების თქმა რომ არ შეიძლება, ეს კარგად იციან შოუში მონაწილე მსახიობებმა. მეტიც, მათ ე.წ. გაუთქმელობის კონტრაქტზე აწერინებენ ხელს და თუ რომელიმე მათგანის მხრიდან შოუს შესახებ ინფორმაცია გაჟღერდება სოლიდური ჯარიმის გადახდის გარდა, სხვა პასუხისმგებლობებიც დაეკისრებათ.

მიუხედავად ამისა, მეისი უილიამსმა ჯიმი ფელონის გადაცემაში უკადრებელი იკადრა და ფანებს მთელი მსოფლიოს მასშტაბით მხოლოდ ერთი წინადადებით გაუხეთქა გული.

გადაცემაში ნათქვამი ფრაზა "როცა გავიგე, რომ არია კვდება" შოკისმომგვრელი აღმოჩნდა მილიონობით მაყურებლისთვის.

საბედნიეროდ, ეს ყველაფერი დადგმული, საპირველაპრილო ხუმრობა აღმოჩნდა.

საინტერესოა, როგორ გაამთელებს არია მაყურებლის გატეხილ გულებს?! იმედია, ამ ყველაფერს იმით აანაზღაურებს, რომ ფინალურ სეზონში არ მოკვდება და ვინ იცის, იქნებ რკინის ტახტზეც კი დაჯდეს.