ბრიტანეთის პრემიერ-მინისტრმა, ტერეზა მეიმ თავისი პარტიის დეპუტატებს განუცხადა, რომ თუ ბრექსიტის მის გეგმას მხარს დაუჭერენ თანამდებობას დატოვებს. ინფორმაცია ამის შესახებ BBC ავრცელებს.

"მზად ვარ ეს თანამდებობა დაგეგმილზე უფრო ადრე დავტოვო. მე ვთხოვ ყველას ამ დარბაზში დაუჭირონ მხარი შეთანხმებას, რომ შევძლოთ ჩვენი ისტორიული ვალის შესრულება და განვახორციელოთ ბრიტანელი ხალხის ნება", — განაცხადა მეიმ.

დიდმა ბრიტანეთმა ევროკავშირი ფორმალურად 2019 წლის 29 მარტს უნდა დატოვოს. ბრიტანეთის პარლამენტმა ბრექსიტის თარიღის გადადებას მხარი 14 მარტს დაუჭირა. მანამდე კი მან ტერეზა მეის განახლებული გეგმა მეორედ ჩააგდო.

ტერეზა მეის შეთანხმება უკმაყოფილებას იწვევს როგორც ევროსკეპტიკოსებში, ისე ბრექსიტის მხარდამჭერებში. გეგმის მოწინააღმდეგეები ამბობენ, რომ მსგავსი გეგმით დიდი ბრიტანეთი დაზარალდება და ევროკავშირის გავლენა ქვეყანაში შენარჩუნდება.

შეთანხმების ყველაზე საკამათო ნაწილი ჩრდილოეთ ირლანდიისა და ირლანდიის საზღვარს ეხება. ეს არის ერთადერთი სახმელეთო საზღვარი, რომელიც დიდ ბრიტანეთსა და ევროკავშირს აქვთ. ახლა ეს საზღვარი ნომინალურად არსებობს.

ტერეზა მეიც და ევროკავშირიც მიიჩნევენ, რომ ირლანდიის რესპუბლიკასა და ჩრდილოეთ ირლანდიას შორის სრულყოფილი საზღვარი არ უნდა არსებობდეს, რაც პასპორტის კონტროლსა და მკაცრ შემოწმებას გულისხმობს. ბოლო შეთანხმებით, ეს საზღვარი ნომინალური დროებითი იქნება, თუმცა აღნიშნული საკითხი პარლამენტის დეპუტატებს არ მოსწონთ.