გადაცემაში შეხვედრები რეგიონულ მედიასთან ჟურნალისტმა, მიხეილ ფეიქრიშვილმა ბიძინა ივანიშვილს ნიკა გვარამიას მიერ გუშინ გაკეთებული განცხადება შეახსენა, რომლის თანახმადაც ფარულ მიყურადებებში დაინტერესებული პირი ბიძინა ივანიშვილია. აღნიშნულზე ყოფილმა პრემიერმა განაცხადა:

"ნიკას რაში სჭირდება ჩუმად მოსმენა, ისედაც ყველაფერს დაუფარავად ლაპარაკობს. ჩვენ მაგაზე ვთქვით უარი. თუ გახსოვთ, ხვედელიძე, დღესაც გულის ტკივილით ვიხსენებ, ქართული ოცნება დემოკრატიული საქართველოს შტაბის უფროსი იყო. და მაგათი ჩანაწერი რომ გამოაქვეყნა, მაგისთვის არ დავზოგეთ. მთავარი მონაპოვარი ახალი ხელისუფლების სწორედ ეს გახლავთ, რომ ეს მოსმენები და მუარადებები შეწყდა. ამდენი ჟურნალისტი ხართ წარმოდგენილი, ერთი შემთხვევა მაინც გაქვთ, რომ ხელისუფლებამ არასანქცირებული მოსმენების მიყურადება განახორციელა?".

ჟურნალისტმა ივანიშვილს შეახსენა, რომ არაერთი ეჭვი და ბრალდება გაჟღერებულა ამ მიმართულებით ხელისუფლების მისამართით, რაზეც ივანიშვილმა მიუგო:

"ეჭვები სულ უნდა გვქონდეს, ჟურნალისტები სულ უნდა ვფრთხილობდეთ ამ მიმართულებით და აგრესიულად, თუ გნებავთ. არცერთი გამოვლინება არ გვაქვს. ის, რომ რესურსი აქვს ხელისუფლებას და ეჭვებს იწვევს, კი ბატონო, მეც ვუერთდები ამას, რომ ხელისუფლებას, უსაფრთხოების სამსახურს, აქვს ამის ყველაზე დიდი რესურსი და შეუძლია მოუსმინოს, მაგრამ ამას უნდა მტკიცებულებები. მე ვიცი, რომ გამოძიებაა დაწყებული. სხვათა შორის, მე ვიცი, რომ ამერიკაში ესაუბრებოდა ერთი მეორეს და ასეთი ზარების მოსმენა ყველა ქვეყანას, მოყვარულებსაც კი შეუძლიათ მოისმინონ".

14 სექტემბერს, ნიკა გვარამიასა და პაატა ბურჭულაძეს შორის სატელეფონო საუბრის აუდიო ჩანაწერი გავრცელდა. ჩანაწერი ატვირთულია YouTube-ზე, georgia-news.org-ის სახელწოდებით გახსნილ არხზე, რუსული სათაურით: ნიკა გვარამია აკონტროლებს "დამოუკიდებელ" პოლიტიკოსებს (Ника Гварамия контролирует "независимых" политиков).

გვარამია აცხადებს, რომ ნამდვილად ღია ხაზზე ესაუბრა პარტია სახელმწიფო ხალხისთვის ლიდერს პაატა ბურჭულაძეს, რადგან დასამალი არაფერი ჰქონდა. ის თავისი სატელეფონო ჩანაწერის გავრცელებაში სახელმწიფო უსაფრთხოების სამსახურს ადანაშაულებს.