Facebook და Twitter Google-ს სიცრუესთან ბრძოლაში შეუერთდნენ. ისინი ერთიანი ძალებით შეეცდებიან ინტერნეტ სივრცე ყალბი სიახლეებისგან გაწმინდონ, რაც, ბოლო პერიოდში, საკმაოდ მოზღვავებულია სოციალურ მედიაში.

კარგად თუ გაიხსენებთ, მიხვდებით, რომ ბოლო, თუნდაც ერთი წლის განმავლობაში, ინტერნეტის დახმარებით იმაზე მეტი ცრუ და არასაჭირო ინფორმაცია შეიტყვეთ, ვიდრე მთელი წინა ცხოვრების განმავლობაში და ვინ იცის, რამდენჯერ გიტირიათ, როცა ინტერნეტ სივრცის აფერისტები ხან ერთ ვარსკვლავს კლავდნენ, ხან კი მეორეს.

პროექტი, რომელიც გუგლმა 2015 წელს დაიწყო, თავდაპირვლად ორ კომპანიასთან, YouTube და Newswire, მოლაპარაკებებით შემოიფარგლებოდა. მოგვიანებით კი ამ პარტნიორობას ჟურნალისტები, პუბლიცისტები, ტელე და რადიო კომპანიები და უბრალო ადამიანებიც კი შეუერთდნენ.

საბოლოო ჯამში სპამთან და ტყუილთან ომში ისეთი გავლენიანი გამოცემები და ორგანიზაციები ჩაებნენ როგორებიც The New York Times, The Washington Post, BuzzFeed News, CNN, ABC News, Agence France-Presse, Channel 4 News, The Telegraph, International Business Times UK, Eurovision News Exchange, Aljazeera Media Network, Euronews, European Journalism Centre, American Press Institute, International Fact Checking Network არიან.

ფოტო: firstdraftnews

ამიერიდან კი Facebook-მა და Twitter-მა ოფიციალურად აიღეს პასუხისმგებლობა, რომ გარდა პარტნიორობისა და საკუთარ გვერდებზე სპამზე ნადირობისა, ისინი ამ კამპანიაში ჩართულ სხვა კომპანიებსაც დაეხმარებიან არასანდო ინფორმაციის აღმოჩენაში.