"ევროპარლამენტსა და ევროკავშირის საბჭოში შეჩერების მექნიზმის განხილვა მიმდინარე კვირაშია ჩანიშნული. სავარაუდოდ, აღნიშნულ საკითხზე, საქართველოსთვის, კოსოვოსა და უკრაინისთვის შეთანხმებას მომავალ კვირაში მიაღწევენ",- ამის შესახებ რადიო თვისუფლების ბრიუსელის ბიუროს ჟურნალისტი რიკარდ იოზვიაკი ტვიტერის საკუთარ გვერდზე წერს.

ევროპარლამენტის სამოქალაქო თავისუფლებათა, მართლმსაჯულებისა და შინაგან საქმეთა კომიტეტმა (LIBE) შეჩერების გამარტივებულ მექანიზმს მხარი 7 ივლისს დაუჭირა.

გერმანიის საგარეო საქმეთა მინისტრმა ფრანკ-ვალტერ შტაინმაიერმა საქართველოში ვიზიტისას განმარტა, რომ ევროპარლამენტში რიგი ფორმალური საკითხები დარჩა გადასაწყვეტი, მათ შორის შეჩერების მექანიზმის ამოქმედება. გამარტივებული შეჩერების მექანიზმის ამოქმედების საჭიროება ევროპაში არსებულმა მიგრანტების კრიზისმა განაპირობა.

მანამდე, 15 ივნისს, ანგელა მერკელმა სატელეფონო საუბარში პრემიერ კვირიკაშვილს უთხრა, რომ გერმანია საქართველოსთვის ვიზალიბერალიზაციას განიხილავს შეჩერების მექანიზმის კონტექსტში.