დე-ფაქტო აფხაზეთის საგარეო საქმეთა სამინისტრო დნესტრისპირეთსა და მთიან ყარაბაღთან უვიზო მიმოსვლის დაწესებას აპირებს. ინფორმაციას ამის შესახებ აფხაზეთის საგარეო საქმეთა მინისტრის მოადგილე კან ტანია რუსულ სააგენტო ТАСС -თან საუბრისას ავრცელებს.

ტანიას ინფორმაციით, აღნიშნული ცვლილება “აფხაზეთში შესვლისა და გასვლის შესახებ “ კანონს უკავშირდება და ის ძალაში 1 აპრილს შევა. კანონის მიხედვით, აფხაზეთში შესვლას მხოლოდ ის მოქალაქეები შეძლებენ, რომლებიც აფხაზეთის დამოუკიდებლობას აღიარებენ და უვიზო მიმოსვლის შესახებ შეთანხმება ექნებათ.

“კანონი, რომელიც პირველ აპრილს შევა ძალაში იმ ქვეყნების მოქალაქეებს შეეხება, რომლებთანაც აფხაზეთს უვიზო მიმოსვლა არ აქვს. ამ ეტაპზე ხელმოწერილი და რატიფიცირებულია რუსეთთან და ნიკარაგუასთან შეთანხმება. ასევე რატიფიკაციის პროცესშია შეთანხმება სამხრეთ ოსეთთანაც”, - განაცხადა აფხაზეთის დე-ფაქტო საგარეო საქმეთა მინისტრის მოადგილემ კან ტანიამ.

მისივე ინფორმაციით, ამ ეტაპზე აფხაზეთში ჩასული ტურისტების უმრავლესობა რუსეთის მოქალაქეა. ტანიამ განმარტა, რომ უახლოეს მომავალში უცხოელი ტურისტებისთვის ფსოუს საზღვარზე ვიზების გაცემის პროცესის გამარტივებასთან დაკავშირებით შესაბამისი პუნქტის გახსნა იგეგმება.

ამ ეტაპზე კი იმისათვის, რომ უცხოელმა აფხაზეთში შესვლის უფლება მიიღოს, ის დე-ფაქტო შინაგან საქმეთა სამინისტროს ვებ საიტზე უნდა შევიდეს, შეავსოს ანკეტა და საკონსულოში გააგზავნოს. პასუხს არაუგვიანეს ერთი კვირის ვადაში მიიღებს და ეცოდინება, რომელი გამშვები პუნქტიდან შეძლებს აფხაზეთში შესვლას.

2015 წლის 29 დეკემბერს ოკუპირებული აფხაზეთის რესპუბლიკის პარლამენტის სახალხო კრებამ მიიღო “აფხაზეთის რესპუბლიკაში შესვლისა და გასვლის შესახებ” კანონი, რომელიც ქვეყნის ტერიტორიაზე შესვლისა და გასვლის წესებს არეგულირებს.