ჯერ კიდევ 2017 წელს, მას შემდეგ, რაც ემა სტოუნმა ლა ლა ლენდში შესრულებული როლისთვის ოსკარი მიიღო, დაიწყო საუბარი იმაზე, რომ სტოუნი დისნეის ახალ ფილმში კრუელა დე ვილის როლს შეასრულებდა.

ამ ამბის გახმაურების შემდეგ ბევრი დრო გავიდა, გასული წლის ოქტომბერში კი ცნობილი გახდა, რომ კრუელას გადაღებები 2019 წლის ზაფხულში დაიწყებოდა და ფილმი 2020 წელს გამოვიდოდა.

ამასობაში ემა სტოუნს კრუელას როლზე კონკურენტი გამოუჩნდა და ის არც მეტი, არც ნაკლები ნიკოლ კიდმანია.

ამ ეტაპზე დისნეის კიდმანთან დაკავშირებული ჭორები არც უარყვია და არც დაუდასტურებია, თუმცა თუ დისნეის წინა ფილმებს გავითვალისწინებთ, სადაც უარყოფითი როლები ჯულია რობერტსმა და ქეით ბლანშეტმა შეასრულეს, გამორიცხული არ არის, როლი სწორედ ნიკოლმა მიიღოს.

კრუელას როლი 1996 და 2000 წელს უკვე აქვს შესრულებული ლეგენდარულ მსახიობს გლენ ქლოუზს.

ჩვენ ისღა დაგვრჩენია დაველოდოთ, ვინ იქნება ახალი კრუელა დე ვილი.