ამერიკის სახელმწიფო დეპარტამენტმა ადამიანების უფლებების შესახებ 2018 წლის ანგარიში გამოაქვეყნა. 47-გვერდიან დოკუმენტში, რომელიც საქართველოს ეხება, საუბარია მედიის მიმართ ზეწოლაზე, გასულ საპრეზიდენტო არჩევნებზე, ხელისუფლებაში კორუფციაზე და მთავრობისა და სამოქალაქო საზოგადოების დაპირისპირებაზე:

"დაძაბულობა არასამთავრობოებსა და მთავრობებს შორის განსაკუთრებით საპრეზიდენტო არჩევნების დროს გაიზარდა. მას შემდეგ, რაც 13-მა არასამთავრობო ორგანიზაციამ შეშფოთება გამოთქვა მაღალი დონის კორუფციის ნიშნებისა და არაფორმალური, კლანური მმართველობის გარშემო, მთავრობის წამყვანმა წევრებმა ორგანიზაციებზე და მათ ლიდერებზე სიტყვიერი იერიში მიიტანეს".

ანგარიშის თანახმად, სახალხო დამცველმა და აღნიშნულმა არასამთავრობოებმა ერთობლივად განაცხადეს, რომ ამგვარი შეტევა სამოქალაქო საზოგადოებაზე აზიანებს დემოკრატიას.

სახელმწიფო დეპარტამენტს მაგალითად მოჰყავს ოქტომბერში პარლამენტის თავმჯდომარის, ირაკლი კობახიძის განცხადება სამართლიანი არჩევნების ხელმძღვანელის, მიხეილ ბენიძის მიმართ:

"სამოქალაქო სექტორის ცნობილი წარმომადგენელი საქართველოს პარლამენტის სპიკერმა "ფაშისტების თანამონაწილედ" მოიხსენია".

სახელმწიფო დეპარტამენტი გასული წლის საპრეზიდენტო არჩევნების შეფასებისას ეუთოს სადამკვირვებლო მისიის დასკვნას ეფუძნება და იმავეს იმეორებს:

"მიუხედავად იმისა, რომ არჩევნები იყო კონკურენტული და პროფესიონალურად ორგანიზებული, დამკვირვებლებმა შეშფოთება გამოხატეს ადმინისტრაციული რესურსის არასწორად გამოყენებისა და არათანაბარი სათამაშო ველის გამო. კერძო მაუწყებლის მკვეთრი პოლარიზაცია, ნეგატიური კამპანია და მკაცრი რიტორიკა მმართველ პარტიას საარჩევნო ადმინისტრაციის ყველა დონეზე აძლიერებდა".

კორუფცია

სახელმწიფო დეპარტამენტი ეყრდნობა არასამთავრობო ორგანიზაციების მიერ მიწოდებულ ინფორმაციას და კორუფციის საქმეების გამოძიებისას სუსტ კონტროლსა და სამართალდამცავი უწყებების ნაკლებ დამოუკიდებლობაზე წერს. ანგარიშში საუბარია ფარულ აუდიოჩანაწერებზე, რომელიც წინასაარჩევნო პერიოდში გავრცელდა:

"აუდიოჩანაწერები ავლენს ახლანდელი და ყოფილი მაღალჩინოსნების მიერ ძალაუფლების ბოროტად გამოყენების, წამებისა და კორუფციის სავარაუდო ნიშნებს, თუმცა ზოგიერთს ამ ჩანაწერების ავთენტურობაში ეჭვი შეაქვს".

სახელმწიფო დეპარტმენტს მაგალითად მოჰყავს მირზა სუბელიანის სავარაუდო აუდიოჩანაწერი, სადაც ისმის, რომ ის თავად "აგვარებდა" ხორავას ქუჩაზე მომხდარ მკვლელობის საქმეს.

ანგარიშში საუბარია ომეგა ჯგუფის საქმეზეც, თუ როგორ მოითხოვეს ქრთამი ყოფილმა და ამჟამინდელმა მაღალჩინოსნებმა ძალადობრივი რეკეტით, მათ შორის, "ყოფილი მინისტრის ფიზიკური შეურაცხყოფით".

სახელმწიფო დეპარტამენტი იხსენებს ივლისში ინფრასტრუქტურის ყოფილი მინისტრის, ზურაბ ალავიძისა და ეკონომიკის ყოფილი მინისტრის, დიმიტრი ქუმსიშვილის პროკურატურაში დაკითხვას კორუფციის შესაძლო საქმეზე: "ზოგიერთი დამკვირვებელი ამ გამოძიებას პოლიტიკურად მოტივირებულს უწოდებს".

"უკანონო ან პოლიტიკურად მოტივირებული მკვლელობები"

ანგარიშში ნახსენებია პანკისის სპეცოპერაციის შედეგად გარდაცვლილი თემირლან მაჩალიკაშვილი. 18 წლის მაჩალიკაშვილი პანკისში ჩატარებული სპეცოპერაციის შედეგად 2017 წლის 10 იანვარს გარდაიცვალა.

"მისი მამა, მალხაზ მაჩალიკაშვილი ამტკიცებს, რომ შვილი უსამართლოდ მოუკლეს. სახალხო დამცველი გამჭვირვალე, ობიექტურ და დროული გამოძიებისკენ მიუთითებს", — ნათქვამია ანგარიშში.

სახელმწიფო დეპარტამენტი ოკუპირებულ ტერიტორიაზე ნაწამებ და მოკლულ არჩილ ტატუნაშვილზეც წერს. ასევე, ივლისში გამოქვეყნებულ ოთხოზორია-ტატუნაშვილის სიაზე.

ანგარიშში ნახსენებია ოქტომბრის თვეში გამოტანილი სასამართლოს განაჩენი, რომლის თანახმად, ყოფილი მაღალჩინოსანი, დათა ახალაია ბრალდებულად სცნეს 2006 წელს სანდრო გირგვლიანის მკვლელობასთან კავშირში.

მედიაგარემო

"მიუხედავად იმისა, რომ საქართველოში გამოხატვის თავისუფლება, პრესის თავისუფლების ჩათვლით, კონსტიტუციითაა დაცული, მაინც იყო ბრალდებები მთავრობის მიმართ, რომ ეს უფლება სათანადოდ უზრუნველყოფილი არ ყოფილა", — ნათქვამია ანგარიშში.

სახელმწიფო დეპარტამენტი წერს, რომ გასული წლის განმავლობაში დამოუკიდებელი მედია ძალიან აქტიური იყო და ფართოდ გამოხატავდა მოსაზრებებს, თუმცა აქვე მოჰყავს მაგალითად ტელეკომპანია იბერიას საქმე, რომელმაც ოქტომბერში შეაჩერა მაუწყებლობა:

"ტელეკომპანია იბერიის დახურვამ და 2017 წელს მმართველი პარტიის სასარგებლოდ სამი ტელევიზიის (მაესტროს, GDS-ისა და იმედის) გაერთიანებამ მედია მრავალფეროვნება შეზღუდა და გაზარდა მმართველი პარტიის მომხრე მედია საშუალებების კონცენტრაცია".

სახელმწიფო დეპარტამენტი ასევე შეეხო იმასაც, რომ არასამთავრობოები აკრიტიკებდნენ საზოგადოებრივ მაუწყებლისა და კომუნიკაციების ეროვნული კომისიის ხელმძღვანელების ახლო ურთიერთობას მთავრობასთან და აცხადებენ, რომ საზოგადოებრივი მაუწყებლის სარედაქციო პოლიტიკა "მიკერძოებულია მმართველი პარტიის მიმართ".

ანგარიშში საუბარია სამაუწყებლო კომპანია რუსთავი 2-ის საქმეზეც და სტრასბურგის სასამართლოს განჩინებაზეც:

"შეშფოთება კვლავ არსებობს მთავრობის ჩარევაზე ოპოზიციისადმი მიკერძოებულობასთან დაკავშირებით ზოგიერთი მედია საშუალების მიმართ. განსაკუთრებით ეს ეხება ქვეყნის ყველაზე ყურებად ტელევიზიას რუსთავი 2-ს".

სახელმწიფო დეპარტამენტის ანგარიში მომზადებულია აშშ-ს საელჩოს და საკონსულოს, საქართველოს მთავრობის წარმომადგენლების, არასამთავრობო, საერთაშორისო ორგანიზაციებისა და სახალხო დამცველის ინფორმაციაზე დაყრდნობით.