ვენეციის კომისიამ საქართველოს პარლამენტის თავმჯდომარისგან ირაკლი კობახიძისაგან მიიღო თხოვნა, საკუთარი მოსაზრება გამოთქვას უზენაესი სასამართლოს მოსამართლეების დანიშვნის საკითხთან დაკავშირებით. ამის შესახებ ნათქვამია ვენეციის კომისიის პრეზიდენტის, ჯანი ბუკიკიოს განცხადებაში, რომელიც კომისიის ვებგვერდზე დღეს, 13 მარტს გამოქვეყნდა. მისივე ცნობით, ვენეციის კომისია ამ თხოვნას სწრაფად შეასრულებს.

ჯანი ბუკიკიო უზენაესი სასამართლოს მოსამართლეობის კანდიდატთა შერჩევის პროცედურისა და კრიტერიუმების შემუშავებასთან დაკავშირებით, ქართულ მხარესთან თანამშრომლობის მზადყოფნას ადასტურებს. ის ამ პროცესში, მოსამართლეთა შესარჩევად, გამჭვირვალე კრიტერიუმებზე მიუთითებს:

"ვენეციის კომისია ხაზგასმით ამბობს, რომ მნიშვნელოვანია, მოსამართლეთა სტატუსი არ დარჩეს განუსაზღვრელი ზედმეტად დიდი დროის განმავლობაში", — ნათქვამია ბუკიკიოს განცხადებაში. ის ასევე აღნიშნავს, რომ მოსამართლეთა უვადოდ დანიშვნა, (პენსიამდე გასვლამდე) მკაფიო და გამჭვირვალე კრიტერიუმებსა და პროცედურებზე დაყრდნობით, აუცილებელია სასამართლო სისტემის დამოუკიდებლობისთვის.

პარლამენტის თავმჯდომარემ ირაკლი კობახიძემ ჯანი ბუკიკიოს უზენაესი სასამართლოს მოსამართლეთა შერჩევაზე, უმრავლესობის მიერ მომზადებული კანონპროექტის შესაფასებლად რეკომენდაციებისთვის მიმართა. კანონპროექტის სხვა ვერსია აქვს მომზადებული უკვე დამოუკიდებელ დეპუტატს ეკა ბესელიას.

21 თებერვალს პარლამენტმა მხარი არ დაუჭირა ეკა ბესელიასა და 8 დეპუტატის მიერ ინიცირებულ კანონპროექტს მოსამართლეების უვადოდ დანიშვნის დროებით შეჩერების შესახებ. კანონპროექტის მიხედვით, რაიონულ და სააპელაციო სასამართლოებში მოსამართლეთა უვადოდ გამწესება 2024 წლის 31 დეკემბრამდე უნდა შეჩერებულიყო.