იუსტიციის მინისტრი თეა წულუკიანი ამბობს, რომ დღეს, 12 მარტს საღამოს უნდა გადაწყდეს მიაღწევს თუ არა შეთანხმებას აღმასრულებელ ხელისუფლებასთან იმ საკითხზე, რაც მის მინისტრად დარჩენა-არდარჩენას გადაწყვეტს.

წულუკიანი არ განმარტავს, თუ რომელ თემაზე მიმდინარეობს დისკუსია, თუმცა ამბობს იმას, რომ ეს არ ეხება არც შეწყალების საკითხს და არც სასჯელაღსრულების იუსტიციასთან გაერთიანების საკითხს. მისი თქმით, თუ შეთანხმება შედგა, ის გააგრძელებს მუშაობას, ხოლო, თუკი მის პოზიციას არ გაიზიარებენ, ის თავის ადგილს ხედავს მხოლოდ ერთადერთ გუნდში და მას ჰქვია "კაკულიების გუნდი": "ეს არის ჩემი მეუღლე და ჩემი შვილი".

"მეშვიდე წელია მე ბატონ დავით სერგეენკოსთან ერთად ვაგრძელებ ამ პოზიციაზე მუშაობას. კვარტალში ერთხელ მიდის მინიშნება იმაზე, რომ შეიძლება გადააყენონ, გაუშვან ან წავიდეს. ახლა არის პირველი შემთხვევა, როდესაც ეს შეეფერება სიმართლეს, და როდესაც მე გამიჩნდა სურვილი, რომ თუ ეს საჭიროა, ადგილი დავუთმო სხვას. ამ თემაზე არ ვისაუბრებდი, ეს ამბავი გარეთ რომ არ გამოსულიყო", — ამბობს წულუკიანი.

მინისტრი ამბობს, რომ დღეს ეს თემა უნდა დაიხუროს, ვინაიდან ხვალ უკვე პრეზიდენტს სალომე ზურაბიშვილთან ერთად მიდის დელეგაციის წევრის სტატუსით ერევანში:

"ბევრი სასაუბრო აღარაფერი დარჩა. ვფიქრობ ერთი კვირა საკმარისი დროა იმაზე სამსჯელოდ რომელი პოზიციაა სწორი".

თეა წულუკიანის თქმით, ქართული ოცნების თავმჯდომარესთან ბიძინა ივანიშვილსან აღნიშნულ საკითხზე არ უსაუბრია.

"არ შემიწუხებია ამ თემაზე", — აღინიშნა წულუკიანმა.

წულუკიანის განმარტებით, მისი პოლიტიკური ადგილი, რა პოზიციაზეც არ უნდა იყოს ის, "არის და ყოველთვის იქნება ქართულ ოცნებასთან":

"თუ არცერთ პოზიციაზე არ ვიქნები, ყოველთვის ვიქნები ქართული ოცნების ამომრჩეველი".