საქართველოს სამეფო ნაციონალური ბალეტი 10 აპრილს რუსეთში ტურნეს იწყებს და კონცერტებს რამდენიმე ლოკაციაზე, მათ შორის კრემლშიც გამართავს. ამის შესახებ ინფორმაცია ბალეტის ხელმძღვანელმა, გელა ფოცხიშვილმა On.ge-ს დაუდასტურა.

კითხვაზე, საქართველოს ოკუპაციის ფონზე რატომ მართავენ კრემლში კონცერტს, ფოცხიშვილი ამბობს, რომ ეს "შეგნებული ნაბიჯია".

"ზუსტად კრემლში უნდა გაიმართოს ასეთი კონცერტი, რათა მიხვდეს რუსეთი, რომ საქართველოს ნაწილია აფხაზეთიც, ოსეთიც და მთელი საქართველო არის საქართველო და არ შეიძლება მისი წაღება და მიკუთვნება... ეს არის ჩვენი პატრიოტული ნაბიჯი იმ მხრივ, რომ აქ არ არის ბიზნესი და ეს არ არის ის, რომ რაღაცა დიდ ეკონომიკურ მატერიებზე იყოს საუბარი", — აცხადებს გელა ფოცხიშვილი.

კითხვაზე, როგორი ფორმით გამოხატავენ პროტესტს, ის ამბობს, რომ ეს იქნება ირიბი კუთხით, რადგან "პირდაპირ ვერ ადგები და ვერ ეტყვი პუბლიკას, რომ პროტესტს აცხადებ".

პირველი შემთხვევა არ არის, როცა ქართული კულტურის სფეროს წარმომადგენლები კრემლში კონცერტებს მართავენ. მსგავსს შემთხვევას ყოველთვის ახლავს თან საზოგადოების მწვავე კრიტიკა და რეაქცია. რუსეთში კონცერტის გამართვისთვის გააკრიტიკეს ქართული ცეკვის ანსამბლი ერისიონიც. ამ კონცერტთან დაკავშირებით ინტერნეტით მოქალაქეების პეტიციაც გავრცელდა, რომლებიც ერისიონისთვის სახელმწიფო ანსამბლის სტატუსისა და დაფინანსების მოხსნას ითხოვდნენ.