8 მარტიდან ყოველ პარასკევსა და შაბათს, ღამის 12 საათიდან დილის 6 საათამდე ღამის ავტობუსი მუშაობას განაახლებს. ის მზაგვრებს ახმეტელის თეატრის მეტროდან ვარკეთილის მეტრომდე მიიყვანს. საპილოტე მარშრუტზე ავტობუსები ერთსაათიანი ინტერვალით და სტანდარტული 50-თეთრიანი ტარიფით იმოძრავებენ. ამასთანავე, შეღავათიანი მგზავრობის ტარიფიც იმოქმედებს.

ღამის ავტობუსი თბილისში უკვე მეორედ დაინიშნა. საპილოტე პროექტის ფარგლებში ავტობუსმა მოძრაობა სექტემბერში დაიწყო.

ავტობუსის სრული მარშრუტი

თბილისის მერიის განცხადებით, ღამის ავტობუსი მოძრაობას მეტროსადგურ ახმეტელიდან დაიწყებს და პირველი გაჩერება დიდ დიღომში, სუპერმარკეტ გუდვილთან ექნება. შემდეგ გაივლის აღმაშენებლის ხეივანს, მარშალ გელოვანის გამზირს, მტკვრის მარჯვენა სანაპიროსა და სააკაძის I გასასვლელთან გაჩერდება. შემდეგ, ღამის ავტობუსი მარჯვენა სანაპიროს პანდუსით გმირთა მოედანზე აუხვევს, თამარ მეფის გამზირისკენ მობრუნდება და წინამძღვრიშვილის ქუჩის გავლით სტადიონ დინამო არენასთან მივა. იგი სტადიონიდან გზას აღმაშენებლის გამზირისკენ განაგრძობს და მეტროსადგურ მარჯანიშვილის მიმდებარედ გაჩერდება. ამის შემდეგ, იგი გაივლის მარჯანიშვილისა და ჯავახიშვილის (ყოფილი ელბაქიძის დაღმართი) ქუჩებს და მგზავრებს ჯერ პირველი რესპუბლიკის მოედანზე გაუჩერებს, ხოლო შემდეგ — თავისუფლების მოედანსა და ბარათაშვილის ქუჩაზე, "კონკასთან".

ავტობუსი გადაკვეთს ბარათაშვილის ხიდს და მგზავრებს ევროპის მოედანზე მიიყვანს. იგი გზას გორგასალისა და გულუას ქუჩებისკენ განაგრძობს და აბანოებთან გაჩერდება. ორთაჭალის გავლის შემდგომ, ავტობუსს მორიგი გაჩერებები ექნება დოდაშვილის მოედანზე და მეტროსადგურ ისანთან. ავტობუსი კახეთის გზატკეცილით ჯავახეთის ქუჩას დაუკავშირდება და მოძრაობას მეტრო ვარკეთილთან დაასრულებს.