"ბიზნესი ჩუმად არაა და მან ზუსტად იცის როდის რა თქვას", — ასე გამოეხმაურა კოკა-კოლა ბოთლერს ჯორჯიას დამფუძნებელი, თემურ ჭყონია თიბისის ბანკის საქმესთან დაკავშირებულ "ბიზნესის სიჩუმეს".

როგორც მან BMG-სთან ინტერვიუს დროს განაცხადა, თიბისი ბანკის საქმეზე ბიზნესმენებს აზრის გამოხატვა უნდოდათ, თუმცა პოლიტიკოსების "არასწორმა მესიჯებმა" ამის სურვილი დაუკარგეს. მისივე თქმით, ისინი პოლიტიკოსები არ არიან, რომლებიც ემოციებს აყვებიან და "ერთ დაძახებაზე გავარდებიან ქუჩაში დროშებით".

ჭყონია პარტია გირჩის კრიტიკასაც გამოეხმაურა, რომელმაც ბიზნესის "ცნობადი და მეტნაკლებად ცნობადი სახეები" თიბისი ბანკის საქმეზე დუმილის გამო გააკრიტიკა და მათ "ცეხავიკები", ფარისევლები და მლიქვნელები უწოდა:

"არავინ არ იცის მამუკა ხაზარაძის ისტორია და მისი დამსახურება საქართველოს ეკონომიკაში ისე, როგორც ჩვენ. ის ახალგამომცხვარი პოლიტიკოსები საერთოდ დაბადებულები არ იყვნენ, როდესაც მამუკა ხაზარაძე და ჩვენ, ის თაობა ვქმნიდით საქართველოს ეკონომიკას. ამიტომ თავი დაანებონ ჩვენს შეფასებებს. სანამ ჩვენს შეფასებას დაიწყებენ, თავისი თავის შეფასება დადონ. რა გაუკეთებიათ მათ გინდა პოლიტიკაში, გინდა ეკონომიკაში, გინდა განათლებაში".

თიბისი ბანკის საქმე

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ.

ამ საქმესთან დაკავშირებით 13 თებერვალს საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობდნენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

21 თებერვალს მამუკა ხაზარაძემ და ბადრი ჯაფარიძემ თანამდებობები დატოვეს. ეროვნული ბანკში განაცხადეს, რომ ხაზარაძის წასვლას მიესალმებიან. მათი თქმით, ეს დადებითად აისახება ბანკის გამჭირვალობაზე.

გარდა ამისა, თიბისი ბანკმა ეროვნული ბანკის წინააღმდეგ სასამართლო დავა შეწყვიტა და განაცხადა, რომ მილიონიან ჯარიმას გადაიხდის. ამასთანავე, ბადრი ჯაფარიძე და მამუკა ხაზარაძე ეროვნული ბანკის წინააღმდეგ კერძო დავას აგრძელებენ.