აშშ-სა და ჩრდილოეთ კორეის ლიდერების სამიტი ვიეტნამის ქალაქ ჰანოიში რამდენიმე საათით ადრე დასრულდება. თეთრი სახლის განცხადებით, დონალდ ტრამპმა და კიმ ჩენ ინმა შეთანხმებას ვერ მიაღწიეს.

Associated Press წერს, რომ ლიდერების კორტეჟმა უკვე დატოვა სასტუმრო, სადაც მოლაპარაკებები მიმდინარეობდა.

თეთრი სახლის პრესმდივნის, სარა სანდერსის თქმით, სამიტის შედეგებთან დაკავშირებით დონალდ ტრამპის პრესკონფერენცია ორი საათით ადრე გაიმართება.

მოლაპარაკებების მეორე დღეს კიმ ჩენ ინი და ტრამპი სადილობას აპირებდნენ, თუმცა დარბაზში არ გამოჩენილან. პირველ დღეს კი კიმ ჩენ ინმა ჟურნალისტებს განუცხადა, რომ ჩრდილოეთ კორეა მზადაა ბირთვულ იარაღზე უარი თქვას. მოსალოდნელი იყო, რომ ისინი სამიტის შემდეგ შეთანხმებას მოაწერდნენ ხელს.

სამიტის პირველი დღე

ჰანოიში ლიდერების შეხვედრა 27 თებერვალს სასტუმრო მეტროპოლში დაიწყო. როგორც მოსალოდნელი იყო, შეხვედრის მთავარი თემა ჩრდილოეთ კორეის ბირთვული განიარაღება და კორეის ნახევარკუნძულის უსაფრთხოება იყო. ლიდერებმა განაცხადებს, რომ წარმატებულ მოლაპარაკებებს ელიან.

ფოტო: Leah Millis / Reuters

ტრამპმა აღნიშნა, რომ ბირთვულ იარაღზე უარის თქმის შემთხვევაში ფხენიანი ეკონომიკურად გაძლიერდება. გარდა ამისა, ჩრდილოეთ კორეასთან დიალოგისას მას რუსეთის, ჩინეთის, იაპონიისა და სამხრეთ კორეის იმედი აქვს.

ჟურნალისტების კითხვაზე მოსალოდნელი იყო თუ არა სამშვიდობო შეთანხმების გაფორმება, აშშ-ს პრეზიდენტმა თქვა "შევხედოთ". თავის მხრივ, კიმ ჩენ ინმა იმედი გამოთქვა, რომ მოლაპარაკებები "შესანიშნავი შედეგით" დასრულდება და ამისთვის ყველაფერს გააკეთებ.

პრესასთან რამდენიმეწუთიანი საუბრის შემდეგ ლიდერები თავიანთ წარმომადგენლებთან ერთად სავახშმოდ წავიდნენ. მოლაპარაკებების ძირითადი ნაწილი კი ხუთშაბათს, 28 თებერვალს უნდა გამართულიყო.

ფოტო: Leah Millis / Reuters