საპარლამენტო უმრავლესობის წევრი, ეკა ბესელია ამბობს, რომ პარლამენტის თავმჯდომარემ, ირაკლი კობახიძემ ბოდიში უნდა მოიხადოს. ამის შესახებ მან პარლამენტში სიტყვით გამოსვლის დროს თქვა.

"პარლამენტის თავმჯდომარე ან ბოდიშის მოიხდის, რაც მან დღეს აქ იკადრა, ან ის ზუსტად იმ ადამიანებისგან იქნება უარყოფილი, ვინც იბრძოდა და იბრძვის დღესაც, რომლითაც გახდა იმ თანამდებობაზე, სადაც ახლა არის. თუ მან არ იცის ეს რას ნიშნავს, ვაჩვენებთ, რას ნიშნავს", — აღნიშნა ბესელიამ.

დღეს, 21 თებერვალს პარლამენტის თავმჯდომარემ პლენარულ სხდომაზე თქვა, რომ ნაციონალურ მოძრაობასა და უმრავლესობის დეპუტატ ლევან გოგიჩაიშვილს შორის კონსენსუსი ნიშანდობლივია, მოსამართლეების უვადოდ დანიშვნის კანონპროექტზე. მალევე კობახიძემ სხდომა დატოვა და დეპუტატების მოთხოვნის მიუხედვად არ დაბრუნდა.

კობახიძის სხდომაზე დასწრება მოითხოვეს როგორც უმრავლესობის, ისე უმცირესობის წარმომადგენლებმა. სხდომის წამყვანმა, ზვიად ძიძიგურმა სხდომის შეწყვეტის საკითხს კენჭი უყარა და აღნიშნა, რომ ამ აზრს მხოლოდ დეპუტატთა უმცირესობა არ დაეთანხმა.

პარლამენტში მოსამართლეების უვადოდ დანიშვნის შეჯერებასთან დაკავშირებით კანონპროექტზე მსჯელობენ. ირაკლი კობახიძემ განაცხადა, რომ კანონპროექტი კონსტიტუციას ეწინააღმდეგება.

ამავე თემაზე: