საპარლამენტო უმრავლესობის წევრი, ეკა ბესელია ამბობს, რომ თანაპარტიელების არგუმენტები მისი ინიცირებული კანონპროექტის შემთხვევაში მოსამართლეთა რაოდენობის განახევრებაზე ხელოვნურია. ამის შესახებ მან პარლამენტში მოხსენების დროს განაცხადა და არგუმენტები მოიყვანა.

მისი თქმით, არსებული 287 მოსამართლიდან 154 უკვე გამწესებულია უვადოდ, 56 მოსამართლე — 10-წლიანი ვადით და 47 მოსამართლეს კი 3-წლიანი გამოსაცდელი ვადა 2020 წელს ეწურებათ. მანვე აღნიშნა, რომ საქართველოს კანონმდებლობის მიხედვით, მოსამართლეებს, ვადის ამოწურვის მიუხედავად, შეუძლიათ თავიანთი უფლებამოსილება შეასრულონ იმ დრომდე, სანამ საქმეების განხილვას არ დაასრულებენ. რიგ შემთხვევებში კი საქმეების რაოდენობა 300-დან 500-მდე მერყეობს.

"მოთქმა და ჩივილი იმაზე, რომ სასამართლო კორპუსი განახევრდება — არის ხელოვნურად შექმნილი არგუმენტი. ეს ინიციატივა არ აჩერებს ახალი მოსამართლეების შემოყვანას ეს ინიციატივა არ უშვებს სისტემიდან არავინ, მაგრამ ეს ინიციატივა არის პარლამენტისთვის ძალიან მნიშვნელოვანი ნაბიჯი და განაცხადი, ვართ თუ არა ქმედებებით მზად გადავდგათ ნაბიჯი რეფორმისკენ და ვართ თუ არა პარლამენტი, რომელიც პოლიტიკურ ნებას აჩვენებს საზოგადოებას, რომ არ დადის იუსტიციის საბჭოს ჭკუაზე", — განაცხადა ბესელიამ პარლამენტში მოხსენებაზე.

მისი თქმით, ხელოვნური არგუმენტები არაა საჭირო, თუ უმრავლესობა მზად არ არის, რომ იუსტიციის უმაღლესი საბჭოს უპატივცემულო გადაწყვეტილებას წინ აღუდგეს და მიიღოს სამართლიანი გადაწყვეტილება.

"საკმარისი არ არის ვილაპარაკოთ, რომ სამართლიანობა გვინდა, რეფორმები გვინდა, აღარ არის ამდენი დაპირებების დრო, იმიტომ რომ 7 წელია ამას ველაპარაკებით ადამიანებს, კონკრეტულ ქმედებებს ითხოვენ ჩვენგან", — განმარტა ბესელიამ.

საქართველოს პარლამენტში ეკა ბესელიასა და სხვა დეპუტატების კანონპროექტს განიხილავენ მოსამართლეთა უვადოდ დანიშვნის დროებით შეჩერების შესახებ. განხილვის მიუხედავად, უმრავლესობამ გადაწყვეტილება უკვე მიიღო. ისინი კანონპროექტს მხარს არ დაუჭერენ. ამის შესახებ პოლიტსაბჭოს სხდომის დასრულების შემდეგ საქართველოს პარლამენტის თავმჯდომარემ ირაკლი კობახიძემ განაცხადა.

ქართული ოცნების დეპუტატმა, იურიდიულ საკითხთა კომიტეტის ყოფილი თავმჯდომარემ პარლამენტის სხდომაზე თქვა, რომ განცხადებები, თითქოს ქართული ოცნება მხარს უჭერდა მოსამართლეების უვადოდ გამწესებას, სიმართლეს არ შეესაბამება.

დასასაბუთებლად ეკა ბესელიას საკონსტიტუციო სასამართლოს გადაწყვეტილება მოჰყავს, რომლის მიხედვითაც პარლამენტს 2017 წლის ივლისამდე უნდა შეემუშავებინა ახალი ნორმა 3 წლიანი გამოსაცდელი ვადის შემდეგ მოსამართლეების უვადოდ დასანიშნად. ამ გადაწყვეტილებით, პარლამენტი იძულებული გახდა გაეუქმებინა ნორმა, რომლითაც მოსამართლეები გამოსაცდელი ვადით ინიშნებოდნენ.

"მე ვისურვებდი, რომ ეს გადაწყვეტილება და განმარტებითი ბარათი წაიკითხონ იმ კოლეგებმა, რომლებიც არასწორ ინფორმაციას ავრცელებენ, მათ შორის ეს ეხება ქართული ოცნების ფრაქციის თავმჯდომარესაც, რომ თითქოს ჩვენ ვუჭერდით მხარს უვადოდ დანიშვნას. ეს ასე არ არის, უნდა წაიკითხოთ გადაწყვეტილება, განმარტებითი ბარათი და ეს ცვლილება ეფუძნება საკონსტიტუციო სასამართლოს გადაწყვეტილებას", — განაცხადა ეკა ბესელიამ.