დეპუტატი პატრიოტთა ალიანსიდან ირმა ინაშვილი ამბობს, რომ ზოგადი უნარები ახალგაზრდებში ლოგიკური აზროვნების განვითარებასთან პირდაპირ კავშირშია. ინაშვილი მინისტრისგან ითხოვს განმარტებას, რატომ აღარ იქნება უნარები გამოცდებზე სავალდებულო საგანი, როცა ის ხშირად კრიტიკულ, ლოგიკურ და შემოქმედებითი აზროვნების განვითარებაზე საუბრობს.

განათლების რეფორმასთან დაკავშირებით განათლების, მეცნიერების, კულტურისა და სპორტის მინისტრი, მიხეილ ბატიაშვილი პარლამენტში მოხსენებით გამოდის. მოხსენების ფარგლებში ის სკოლებში CAT-ის გამოცდების გაუქმებასა და ეროვნულ გამოცდების ფორმატის ცვლილებასაც შეეხო.

ზოგადი უნარების გამოცდა საქართველოში 2005 წლიდან ტარდება, 2020 წლიდან კი უნარების გამოცდის ჩაბარება სავალდებულო აღარ იქნება.

ზოგადი უნარების ტესტის სავალდებულოობას კანონით დარეგულირებს ითხოვს ევროპული საქართველოს დეპუტატი, სერგი კაპანაძე. მისი თქმით, ნებისმიერი განათლების მინისტრი ცვლის საგანმანათლებლო სისტემას თავისი სურვილებიდან გამომდინარე ისე, რომ ალტერნატივებსაც არ გვთავაზობს.

გარდა ამისა, განათლების რეფორმის ფარგლებში 2020 წელს ეროვნულ გამოცდებზე ქართული ენისა და ლიტერატურისა და უცხო ენის გამოცდები სავალდებულო იქნება ყველასთვის. მესამე სავალდებულო საგანი განისაზღვრება უმაღლესი სასწავლებლის პროგრამების მიხედვით: ტექნიკური მიმართულებების შემთხვევაში — მათემატიკა, ხოლო ჰუმანიტარული მიმართულების შემთხვევაში — ისტორია.

ამავე თემაზე:

ნუ შეგეშინდებათ სიბნელის, თუ ბოლო ნათელია — ლომია რელიგიის გაკვეთილის შემოღებას ითხოვს