"გუშინ ცუდად იქცეოდნენ, დღეს კარგად იქცევიან, ამ ლოგიკით მიშა სააკაშვილი დღეს გვეტყვის, რომ კარგი ბიჭი გავხდები და მოდით, მივიღოთ", — ასე ეხმაურება უმრავლესობის წევრი, ეკა ბესელია პარლამენტის თავმჯდომარის, ირაკლი კობახიძის განცხადებას, რომელმაც თქვა, რომ მოსამართლეები, რომლებიც მასობრივად სჩადიოდნენ ცუდ რაღაცებს, ახლა სჩადიან კარგ რაღაცებს.

"მოდით, ამ ლოგიკით ყველასთვის გავხსნათ კარი. მე მგონია, რომ კეისარს კეისრისა და ყველას თავისი როლი და ადგილი უნდა ჰქონდეს. მე არ ვამბობ, რომ შური ვიძიოთ, რევანშისტები ვიყოთ, მაგრამ სამართლიანობა აბა რაღაა?", — თქვა ბესელიამ ტვ პირველის ეთერში.

მისივე თქმით, ირაკლი კობახიძის ამ განცხადებასთან დაკავშირებით, უმრავლესობის დღევანდელ შეხვედრაზე სამდურავი გამოთქვა.

ირაკლი კობახიძემ გუშინ თქვა, რომ პირები, რომლებიც მურუსიძე-ჩინჩალაძის კლანს ეწინააღმდეგებიან, 2012 წლის შემდეგ მათ მიერ განხილულ ვერც ერთ პრობლემურ საქმეს ვერ ასახელებენ.

"ერთი საქმე დაგვიდეთ 2012 წლის შემდეგ, როცა საუბარია დღეს არსებულ კლანზე, ვეკითხებით, ეს ხალხი რას აფუჭებს დღეს?", — აღნიშნა კობახიძემ.