"სტუმარი მასპინძელს რომ ეტყვის მიბრძანდიო, ანომალიასთან გვაქვს საქმე", — ასე პასუხობს ეკა ბესელია ქართული ოცნების გენერალურ მდივანს კახი კალაძეს, რომელმაც თქვა, რომ "ვისაც პარტიის დატოვება უნდა, მათთვის კარი ღიაა". დღეს, 5 თებერვალს ეკა ბესელიამ პარლამენტში ჟურნალისტებთან საუბრისას განაცხადა, რომ კალაძის რეპლიკა მისთვის მოსაწონი არაა და პარტიის გენმდივანი "ასე არ უნდა საუბრობდეს".

"რას ნიშნავს, არ გიღირს შენი თანაგუნდელი? მე არ ვარ სტუმრად მისული. უკაცრავად, მაგრამ მე დავხვდი იმ ხალხს ვინც მოვიდა. ამიტომ სტუმარს შეიძლება უთხრა, თუ ვერ ხვდება, მიბრძანდი... თუ მასპინძელი გადაწყვეტს, რომ სხვაგან წავიდეს, გადაწყვიტოს თვითონ. ამიტომ არ ველაპარაკოთ ასეთ ტონალობაში ერთმანეთს", — ამბობს ბესელია.

On.ge-ს ჟურნალისტის კითხვაზე, მიუხედავად ყველაფრისა, დატოვებს თუ არა იგი უმრავლესობას, ბესელია ამბობს, რომ მას არ უჭირს თავისი გადაწყვეტილებების გაჟღერება მას შემდეგ, რაც მიიღებს. ის ასევე ამბობს, რომ არც ის აქვს გადაწყვეტილი, დაესწრება თუ არა უმრავლესობის ხვალინდელ სხდომას პარტიაში:

"დღეს გეუბნებით იმას, რა განწყობაც, რა ემოციაც და რა პოზიციაც მაქვს".

პარტიის წევრებს შორის განსხვავებულ პოზიციებზე პარტიის გენერალურ მდივანს გედევან ფოფხაძის განცხადების შემდეგ ჰკითხეს. გედევან ფოფხაძის თქმით, ის ვერ ხედავს მოსამართლეებთან დაკავშირებით გუნდში ერთსულოვნებას და მისი დატოვება სწორ გადაწყვეტილებად მიაჩნია.