ქართული ოცნების დეპუტატი გედევან ფოფხაძე უმრავლესობის დატოვებას გეგმას. ამის შესახებ მან ჟურნალისტებს განუცხადა.

გედევან ფოფხაძის თქმით, ის ვერ ხედავს მოსამართლეებთან დაკავშირებით გუნდში ერთსულოვნებას, ამიტომ გუნდის დატოვება სწორ გადაწყვეტილებად მიაჩნია. დეპუტატმა ასევე თქვა, რომ ხვალ, 6 თებერვალს ჩანიშნულ უმრავლესობის სხდომაზე არ მივა.

"საბოლოო გადაწყვეტილებას ჩემს მეგობრებთან ერთად მივიღებ, მაგრამ მგონია, რომ ჩვენ ღირებულებებით ძალიან დავშორდით ერთმანეთს. ეს რეალობაა და ფაქტობრივად ეს ასეც ფიქსირდება უმრავლესობის სხდომებზე, გვაქვს პრინციპული განსხვავებული პოზიცია და შეურიგებლები ვართ იმ ტენდენციებთან რაც ფიქსირდება სასამართლოსთან მიმართებით", — განაცხადა გედევან ფოფხაძემ.

მისი თქმით, დანამდვილებით ვერ იტყვის, თუმცა ამ ეტაპზე მისი განწყობა უმრავლესობის დატოვებისკენ იხრება.

"მე მჭირდება უფრო მეტი დამოუკიდებლობის ხარისხი, იმისთვის, რომ ხალხთან ბოლომდე გულწრფელად, ღიად ვისაუბრო, რაც ეხება სასამართლო თემას და ქვეყნის პოლიტიკურ განვითარებას. ის რომ განსხვავებული აზრის საჯაროდ თქმა არის არაგუნდური, ჩემთვის მიუღებელია", — ამბობს დეპუტატი.

გედევან ფოფხაძის თქმით, მისი გადაწყვეტილება განაპირობა, როგორც პოლიტსაბჭოს მიერ გამოქვეყნებულმა განცხადებას სასამართლოში მიმდინარე პროცესებზე, ასევე იურიდიულ საკითხთა კომიტეტის თავმჯდომარის პოსტზე დეპუტატ ანრი ოხანაშვილის წარდგენამ.

მისი თქმით, პოლიტსაბჭოს განცხადებიდან იკვეთება, რომ ქართული ოცნება მხარს უჭერს მოსამართლეთა კორპუსს და სასამართლო სისტემაში მიმდინარე პროცესებს ნაციონალურ მოძრაობას აბრალებს, რაც ობიექტური არ არის.

ქართული ოცნების პოლიტსაბჭო სასამართლო ხელისუფლების საკითხზე, არასამთავრობოებისა და საზოგადოების კრიტიკასთან დაკავშირებით განცხადებას ავრცელებს. მათი თქმით, არ დაუშვებენ სასამართლოს უსამართლო, უკანონო და აბსოლუტურად მიუღებელ დისკრედიტაციას.