გიორგი პაპავას თქმით, გიორგი ქადაგაძის მხარდაჭერის გამო ილიას უნივერსიტეტის ბიზნეს-სკოლის ხარისხის მართვის უფროსის თანამდებობიდან გაათავისუფლეს. 31 იანვარს ილიას სახელმწიფო უნივერსიტეტის ბიზნესის სკოლის ყოფილმა დეკანმა, გიორგი ქადაგიძემ განაცხადა, რომ უნივერსიტეტისთვის ცვლილებები და ძირეული სიახლეები მიუღებელია და თანამდებობიდან მოხსნეს.

როგორც პაპავა Facebook-ზე წერს, გათავისუფლებამდე რამდენიმე დღით ადრე მიიღო შეტყობინება, რომ ბიზნესის სკოლა ახალი ფაკულტეტის ერთ-ერთი მიმართულება გახდა. მისი თქმით, ამ საკითხზე ფაკულტეტის პროფესორებთან შეხვედრა ჩაინიშნა, სადაც მან და ბიზნესის სკოლის ასოცირებულმა პროფესორმა, გიორგი ისაკაძემ კრიტიკული შეფასება დააფიქსირეს და შეხვედრა დატოვეს. ხოლო მეორე დღეს მიიღო შეტყობინება, რომ ის კანცელარიიდან გათავისუფლებულია.

"ბევრი ტექნიკური საკითხი შეიძლება მოიყვანოს მიზეზად ცენტრალურმა ადმინისტრაციამ, რომლის არცერთ წარმომადგენელს ჩემთან არც ბიზნესის სკოლაში უკვე განხორციელებულ ცვლილებებზე უკითხავს აზრი, არც იმის პატივი დაუდია კანცელარიის მეილით არ გამეგო გათავისუფლების შესახებ, მაგრამ რეალურად ჩემი შეფასებით, ჩემი გათავისუფლება მხოლოდ ერთადერთი მიზეზით აიხსნება: გიორგი ქადაგიძის და მასთან ერთად ბიზნესის სკოლაში განხორციელებული ცვლილებების მხარდაჭერა", — წერს პაპავა და აქვე დასძენს, რომ ის დანებებას არ აპირებს.

ამ საკითხზე On.ge-ს უნივერსიტეტთან დაკავშირება სურდა, თუმცა ვერ შეძლო.

შესწორება: მასალის თავდაპირველ ვერსიაში აღნიშნული იყო, რომ პაპავა ილიაუნიდან გაათავისუფლეს, რაც დაზუსტდა, ის ამ უნივერსიტეტში დაკავებული თანამდებობიდან გაათავისუფლეს.

ამავე თემაზე:ილიაუნის აკადემიური საბჭო გიორგი ქადაგიძეს პასუხობს