ელისო ბოლქვაძე, ერთიანი ნაციონალური მოძრაობის, მთაწმინდის რაიონის მაჟორიტარობის კანდიდატის, ნიკა რურუას, საარჩევნო ვიდეო რგოლში თავისი კადრების გამოჩენას გამოეხმაურა. პიანისტის განცხადებით, ღონისძიების კადრების გამოყენებასთან დაკავშირებით მას პრეტენზია არ აქვს, მაგრამ არ სურს პოლიტიკურ პარტიასთან ასოცირდებოდეს.

ტელეკომპანია იმედთან სატელეფონო ინტერვიუში ელისო ბოლქვაძე განმარტავს, რომ არცერთ პარტიასთან კავშირი არ აქვს და ის არ დგას ნაციონალური მოძრაობის ღირებულებებთან ახლოს, სწორედ ამიტომ მოუწოდებს ნიკა რურუას მისი კადრების გამოყენებისგან თავი შეიკავოს:

"მიუხედავად იმისა, რომ ეს არის საჯარო კადრები, როდესაც პოლიტიკური პარტია ან ადამიანები რომლებიც პოლიტიკურ ძალას წარმოადგენენ და მაჟორიტარად იყრიან კენჭს იყენებენ მათ სარეკლამო კლიპში, მინიმუმ არაკორექტულია ჩემი სახე გამოიყენონ და არ მკითხონ."

ამ ფაქტთან დაკავშირებით განცხადება გააკეთა ნიკა რურუამ. მან აღნიშნა რომ, ვიდეორგოლი მისი მინისტრობის პერიოდში ჩატარებულ კონცერტებს ასახავს და პიანისტის კადრებში მოხვედრა უბრალოდ ფაქტის ასახვაა:

"ადამიანის სახელის და გვარის პიროვნული გამოყენება არ ყოფილა, უბრალოდ გვინდოდა გვეჩვენებინა, რომ გარდა იმისა რომ ვეხმარებოდით ქართულ სეზონს, ქართულ კინოს, ლიტერატურას ვეხმარებოდით ასევე მუსიკას. მე ვერ ვხედავ აქ ვერაფერს მიუღებელს და თუ მაინცდამაინც გამოჩენა არ სურს ერთი წამით, პრობლემა არ არის ამოვჭრით."

არასამთავრობო ორგანიზაციაში სამართლიანი არჩევნებისა და დემოკრატიის საერთაშორისო საზოგადოება აღნიშნავენ, რომ საარჩევნო კუთხით დარღვევას ადგილი არ აქვს და მუსიკოსმა თავად უნდა გადაწყვიტოს გამოიყენებს თუ არა სასამართლოს გზას საავტორო უფლებების დასაცავად.

სოციალურ ქსელში გავრცელებულ რეკლამაში ჩანს ტელეკომპანია Mezzo-ს მიერ გადაღებული კონცერტი, რომელიც ნიკა რურუას კულტურის მინისტრობის პერიოდში თბილისში ჩატარდა. ამ ეტაპზე ნიკა რურუას ოფიციალურ ფეისბუქ გვერდზე ატვირთულ სარეკლამო რგოლში ელისო ბოლქვაძის კადრები ამოჭრილია.