თბილისში, გლდანის მეხუთე მირკოში გუშინ, 29 იანვარს, დღისით ბინა გაქურდეს. როგორც ბინის მფლობელმა On.ge-ს უამბო, წაღებულია ოქროს ნივთები და ფული.

ის ამბობს, რომ სახლიდან დაახლოებით ორი საათის განმავლობაში იყო გასული, უკან დაბრუნებულს კი კარი ღია დახვდა. მისი თქმით, ადგილზე მისული იყო კრიმინალური პოლიციაც.

გამოძიება სისხლის სამართლის კოდექსის 177-ე მუხლის მეორე ნაწილის "ა" ქვეპუნქტითა და ამავე მუხლის მესამე ნაწილის "გ" ქვეპუნქტით მიმდინარეობს. ამ მუხლით სხვისი ნივთის ბინაში უკანონო შეღწევით მოპარვა ისჯება ოთხიდან შვიდ წლამდე პატიმრობით.