დიდი ოდენობით ქრთამის აღებაში დახმარების ბრალდებით ვაკის რაიონის გამგებლის მოადგილე თეიმურაზ ჩოჩუა დააკავეს. სუს-ის ინფორმაციით, მას ბრალად ედება წყალტუბოს საკრებულოს თავმჯდომარისთვის დახმარების გაწევა, ქრთამის აღებაში.

სუს-ის მიერ ჩატარებული გამოძიების ვერსიით, თემურ ჩოჩუამ წყალტუბოს მუნიციპალიტეტის საკრებულოს თავმჯდომარე გრიგოლ ივანეიშვილს უცხოელი ბიზნესმენი დააკავშირა, რომელიც ქალაქ წყალტუბოში მდებარე საკრებულოს ყოფილი შენობის შესყიდვით იყო დაინტერესებული. სუს-ის ინფორმაციით, გრიგოლ ივანეიშვილი უცხოელ ბიზნესმენს ამ შენობის წინასწარ შეთანხმებულ ფასად აუქციონზე გატანას და ქონების შესყიდვაში დახმარებას დაპირდა.ამის სანაცვლოდ კი ქრთამის სახით 250 000 ლარის გადახდა მოსთხოვა.

სუს-ის მტკიცებით, თეიმურაზ ჩოჩუამ გრიგოლ ივანეიშვილს დახმარება გაუწია თანხის გადახდის გარანტად, უცხოელი ბიზნესმენის მიერ დაფუძნებული კომპანიის 16%-იან წილის ივანეიშვილის ნდობით აღჭურვილი პირის საკუთრებაში გადაცემასა და 250 000 ლარის ქრთამის სახით აღებაში.

გამოძიება თეიმურაზ ჩოჩუას მიმართ განსაკუთრებით დიდი ოდენობით ქრთამის აღებაში დახმარების ფაქტზე მიმდინარეობს, რაც სასჯელის სახით 11-დან 15 წლამდე ვადით თავისუფლების აღკვეთას ითვალისწინებს.

ამავე საქმეზე წყალტუბოს მუნიციპალიტეტის საკრებულოს თავმჯდომარე, გრიგოლ ივანეიშვილი საკრებულოს სხდომის დროს დააკავეს.